دَخلَك يا راكب الوفا محكي للشّاعرشريف قاسم

محزون قلبي
محزون قلبي كتير ع حبابو
معرّش أسى وفراق ع تيابو
صرلو شتي ناطر
ع الدرب...بالخاطر
بلكي بيمرق هالحلو مرقة
ع البال ....لو سرقة
وبيطل من بين الزهر
من تحت حجرات القهر
أو مع شِ نسمة معتّرة
أو مع فراشة ع الهجر
بالهم دوم مزنّرة
وبالشوق محترقة
دخلك يَ راكب بالوفا
ورايح على بلاد الجفا
سلّم على حباب العمر
اللي زوزقو فوق الصدر
وتغرّبو بأرض النوى
وتمرمرو بشوك السفر
مرّة مع رفوف الهنا
ومرّات ع بواب الصّبر
من دون ما يدرى الخصر
والمحرمة الزّرقة
خدلن بدربك ليلكي
متلي أنا متشربكي
تركا وليفا بلا أمل
وعيونها ملّا البكي
وقلّن إذا مَ بتذكروا
غناني المحبة والقمر
والنّط من فوق الشّجر
والشّط ومطل البرد
والدالية الشّيبة حلاها
معمشقة فوق السّهر
ولْف اللي سوسح مهجتو
حب اللي مرجح جدلتو
صفرن ونشفت دمعتو
وصار الأمل من خيبتو
يشهق ويكتب بالهوا
يا احباب دوّبني النوى
لأيمتي الفرقة
شريف قاسم ٥ /٤ /٢٠٢٠