تويت
الوحشة....!
قصيدة شعبية
شعر: مسلم الطعان
الإهداء: اليهما وحدَهُما هناك، و أنا هنا أعيشُ وحيداً في صومعتي، أكابدُ الغُربةَ وأصارعُ أشباحَ الوَحشَةِ، و عزائي الوحيدُ : جمرةُ القصيدةِ التي أكتوي بها و يَقبضُ عليها قلبي بقوّةٍ و عنادٍ قرويّْ...!
الوحشه: بِلشه
طيفْ تايه مالگاش إخيوط رمشه
سبحه متطّشر خرزها
و طير فحطانْ وبعيد إعليهْ عِشّه
الوَحشه: ممشه
وآنه إمسلسله أجدامي:
إتريد تمشي و ما لگت للمَمشه مَمشه،
الوَحشه: عَبْره
تنخنگ بأحبالْ عَبْره
إوْ دَمعه إمچلبَه إبغصنْ جَمره يتيمه
إتدوِّر إبموگد سوالفها إعلى جَمرَه
وآنه جمراتي غشيمه
إيدوّرَنْ إبْ: بستانْ ضِلعي:
عَنْ جَمُر ْ دايمْ الخُضرَه،
الوَحشه: ضيمْ
روح متعوَده إعلى روح
إتسولفْ إوياها إوْ تِهيمْ
إوْ غيمْ يبچي إجروح روحه
و بالبَچي إيواسيهْ غيم
الوَحشه: وَحشه
منجَلْ إمسودَنْ إو حالِفْ:
كلْ حِلِمْ أخضَر ْ يحّشَّه،
الوَحشه: وَحشه
دمعه حبلى:
إتجيبْ تومْ من الهمومْ
إو تحبَلْ إبهَمْ الهمومْ
و يجي اليومْ
تطلگ وخدها تخدشه،
من الوِجَع ْ:
تصيرْ أظافرها مساحي إتحَفِرْ بيرْ
بيرْ دَمْ:
يبني فوگه الحِزِنْ عَرشَه،
الوَحشه: وَحشه
هرشْ مَگطوع إوْ يدّوِر ْ
بينْ الهروش إعلى هِرشَه،
الوَحشه: لومْ
إو كومْ آهات إشكبرْها
جَمره وكحَه إمعانده جَمرة جَمرْها
مُهره مفطومَه إعلى بوسه
و يابسَه إشفايفْ مُهرْها،
الوَحشه: شَمعَه
طافيه إبليله غريبه
مَرعدَتها إذيابْ ريح
والغريبْ إيصيح
يَمْها
إيصيييح بسْ مَحّدْ يسمعه
الغَريبْ اليمْها مشتعله إجروحه
إيحشّمْ إدموعَه الحزينه
يبچي و إبعيدينْ رَبعَه،
الوَحشه: خَنگه
الرِيَّه لو وَشَّلْ هواها إتريد مَلگه
الرِيَّه لو ما جاستها نَسمه
النِفَسْ وَيَّاها يذبَلْ
إتصيرْ وِرگه:
وِرگه تشهَگْ بألفْ شَهگه
و ماكو ورگه إتسولفْ إوياها إبْمَحَنَّه،
الوَحشه: مِحنَه
إتسولفْ إبحرگة حزنها
ومن يطّفي هيچي حرگه
العشگ تذبلْ إوروده
كون مامش گلبْ يَمَّكْ
تشتمْ إبدگاته عِشگه
النَخَلْ يلبسْ ثوبْ أسوَد
لو يشيلْ إبعيييدْ عِثگه،
الوَحشه: حِرشه
بالظنونْ..؟!
لو إحجارَة طيشْ غُبشَه:
إتفزّزْ إچلابْ الظنونْ...؟!
چا شلونْ....؟!
من تظلْ تنبَح إچلابچْ يا ظنونْ
أظنْ ما تنفع بَعَدْ چلمة: تِهونْ
ها: يجونْ..؟!
لا: ما يجونْ
إو هيچي إتمرعِدْ إبگلبي:
إتظلْ سچاچينْ الظنونْ
وأصرخْ بكلْ حيلْ حيلي
إو حيلْ أسألكْ: ما يجونْ...؟!
تبلَع إلسانَكْ إوْ تسكت ْ
إِتچذِّبْ إعليَّه يا گلبي...؟!
الوَحشه: متوحشه
عَليكْ
أشباحْها إمحزّمَه إحزامْ
تاكلْ و تشربْ مخالبْها بعذابَكْ
بالنَهار..بالظلامْ:
تقرا بَسْ يبچي كتابَكْ
الوَحشَه عِدْها إلسانْ يجرَح ْ
إيْطلِّع أحزانَكْ و يفضَح ْ:
ذكرياتَكْ
إوْ ما يسّكّتْها عِتابَكْ
و إنته تطحَنْ بالضلوع:
إِبرّحَّة الهلبت ْ يجونْ
وينْهمْ خايبْ يا گلبي...؟!!
ها يا گلبي:
ها كثرْ هالوَحشه توجع ْ
آآآآخْ من وَحشة عَذابَكْ
وينْ إِدينْ التدگْ بابَكْ...؟!
إتبلّلْ إشفافَكْ إِبمايْ
تِطفي بيهْ جَمرة سَرابَكْ
الوَحشه حتى الوَحشه مثلكْ:
تنتظر ْ جَيَّة أحبابَكْ
وينهمْ خايبْ يا گلبي...؟!!!
الإثنين المصادف 13/5/2024
الساعة العاشرة
صباح سيدني