تويت
العامري ابوزين
لماذا سمك الصبور في البصره هو السمك الوحيد الذي يباع بطريقة العدد (زوج الصبورسمكتين) وليس بالوزن الكيلوغرام مثل بقية الاسماك ؟؟؟؟
هل هناك تفسير او علاقه تاريخيه بالامر ؟؟؟
((البصرة والصبور ))
من تسأل بصراوي شنو غداكم يجاوبك صبور لان بالبصرة الكائنات البحرية تنقسم الى اربعة انواع
سمچ وصبور وزبيدي وروبيان
وللصبور معزة خاصة جدا عند اهل البصرة حيث يكون الوجبة الرئيسية في الغالب لكل يوم جمعة اثناء موسم الصبور، من نهاية شهر شباط الى نهاية شهر حزيران.
الصبور ينباع بالعدد وليس بالوزن كباقي انواع السمك وطبعا البصاروة يفضلون صبورة الشط على صبورة البحر لان اثناء انتقالها من الماي المالح للماي الحلو لوضع البيوض يصير عليها تغيير بايلوجي يجعل طعمها اطيب.
تتملح الصبورة يم السماچ بعد ما يشكها من الظهر وتوصل للبيت تنغسل وتتملح وتتحشة ببصل وثوم ونومي بصرة وياها قليل من المعجون وتمر الهند ويندكن بهاون او بخلاط وينمسح ظهر الصبورة بتمراية وينزلن لتنور مجمر بشلاخ نخل واكو طريقتين للشوي اما السمجة مفتوحة يعني بطنها وظهرها يتعرضن للنار او مغلقة يعني بس الظهر تلوحة النار والبطن تستوي براحتها.
(الصبور) ينوكل وية الخبز والبصل او وية التمن الابيض او التمن الباقلاء مع الشبنت اما التمن الاحمر فمايصير وي الصبور ورة ماتخلص من صبورتك تشرب وراها كلاص لبن وفندوس تمر وتنام نومة اهل الكهف كأنما فاقد الوعي. وتكعد كانه فاكك البنج من عملية فوق الكبرى. ولذلك يقال عن الصبور ماكول مذموم واطيب جزء في الصبورة هو بطن الصبورة الجزء الوسطاني جوةالراس بصبعين والاطيب من الصبور نفسه هو الثروب مال الصبور من تطلع حارة من التنور.
السمج يجمعنا