قصيدة شعبية: أجراسْ الظنون ْ.للشاعر: مسلم الطعان

قصيدة: أجراسْ الظنون ْ...!
قصيدة شعبية
شعر: مسلم الطعان
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!
الظنونْ أجراسْ خرسه
خرسه
بسْ بيها طَبعْ:
الأخضرْ ويابسْ تحرگه
كونْ مرّه تنسمعْ....!

الظنونْ:
إبهالوَكِتْ:
كلّشْ عزيزه
فاتحه أبواااابْ الصداقه
وعدْها أصحاااااابْ او رَبعْ...!

الظنونْ:
فاتحه دكانْ خضره:
اتبيعْ كلْشي:
او فاكهتها الطيبه آهااااتْ او دمع ْ...!

الظنون ْ:
سبحه بيها الليلْ نايمْ
وماتحبْ إِيدْ الضِوا
الظنونْ:
رِيَّه:
واليسولفْ بيها ينطيها هِوا
الما يسولفْ بالظنونْ :
أبعيد عن معنى العباده
او مو تَقي او گلبه وَرِعْ...!

الظنونْ:
من تدگْ مسمارْها:
إبگلبْ اليحبْها
ايظلْ وَفي مسمارْها وما ينشلِعْ...!

الظنونْ:
اسلاحْ باشطْ
الخالي منه الناسْ تعتبره جبانْ
موشْ أخو خَيْته ولا ينعٓدْ: سَبعْ...!

الظنونْ:
أويَهْ الخرابْ:
إكتابْ خوّه
خوّه زينه:
او عِشره حلوه:
اوضلعْ ما ينطي ْ ابضلعْ...!

اشكثرْ ناسْ:
زادْها خبزْ الظنونْ
تقرا تكتبْ بالظنونْ
والظنونْ:
إِدينْ مليانه مخالبْ
أشباحْ تنهشْ بالضميرْ
ومايضمْ قاموسْها كلمة: شِبعْ...!
اشكثرْ جوعانه الظنونْ:
وما يضمْ قاموسْها كلمة:شِبعْ....!
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!
الخميس المصادف/٦-٧-٢٠١٧
الساعة الخامسة صباحا
الكوفة