تويت
فى اول الجواز كنت عايش فى العباسية فى بيت نسايبى.. على حافة صحراء العباسية عند مشارف مقاب*ر الغفير.. يعنى عندنا شباك بيطل على الدنيا وشباك بيطل على الاخرة.. ولانه كان اخر بيت فى المنطقة فكنا اول من يستقبل الفيران فى البيت.. وأنا بخاف منهم واترعب فوق ما حد يتخيل..
وافقت على الحياة هناك لان البيت كان لقطة.. كفاية أقولك ان الصالة كان طولها مثلا 11 متر.. واول ما اتجوزت روحت انا ومراتى نقضى شهر العسل فى اسكندرية ولما رجعت اول يوم نمت من التعب محستش بحاجة..
تانى يوم ..رجعت البيت متأخر لقيت الدنيا هس هس والبيت مضلم وحاجة تخوف.. واول ما دخلت الصالة حسيت بحركة غريبة .. وهنا بدأت الافكار السودا تطاردني.. وقلت ليكون البيت مسكون بالاشبا*ح ولا حاجة.. ومع ذلك تقدمت بشجاعة ولقيت انهم محضرين لى العشا على صينية فى اوضة مجاورة.. وقعدت اكل .. وفجأة سمعت صوت فى الصالة برة.. والصالة كبيرة وضلمة .. فخرجت على طراطيف صوابعي وقلت بشجاعه "مين ..مين ؟" وسكت الصوت وبعدين رجع من جديد .. وفجأة لقيت غاغة برة فجريت ولعت النور.. وعنها لقيت فيران اشكال والوان.. ابيض واسود ورمادي..
جريت على مراتى اقولها الحقى .. فقالت فى ايه ؟ قلت لها الصالة مليانة فيران فقالت طيب وايه يعني.. اتاريهم عارفين الحكاية وحاولوا يبيعوا البيت اكتر من مرة ومعرفوش..
ـ وعملت ايه يا استاذ فؤاد ؟
ابدا .. تشجعت .. وتانى يوم رحت اشتريت بندقية رش.. وكل يوم الساعة 8 لحد الساعة 12 بقيت اقعد فى مكان عالي واصطادهم واحد واحد لحد ما قضيت عليهم..
#الحكواتي_الهامي_سمير
#فؤاد_المهندس