تويت
قصيدة : إشجيرة برتقال
قصيدة شعبيه
شعر : مسلم الطعان
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!
إشجيرة برتقال إبظلك الروح
توَها ورَّدت وإنتعش دمها...
تريدك دوم ظلها او عنها مَتروح
او گلبك ما يغرّد بس بإسمها
العمر سبحه او تطشر شوگ وياك
او خرزات السنين إشلون ألمها..؟!
لوَن الخيط بيها إنگطع بجفاك..
يظل يبچي إعلى خيط الحب حلمها
حسبه الروح بيها دومها إتنوح...
عليك او كون تسكت غير أسمها..
مساحي الهم خذنها او حفرن اجروح
او عاله إعلى العليل اجروح همها
تعال او رَوِي حبها إبعشگ مملوح
واذا ما جيتها يذبل رسمها......
أنا إبدونك حبيب الروح مجروح
إو جيوش إجروحي ماحلَت حزمها
تعال إو حسره بيها إتريد ملگاك
الحسره إتهيج لو واحد كتمها..
إبعشرة بَلَم ويَه إجروف تتناك
الجروف إتنوح من يبطي بَلَمها
تعال إحضن جرحها رايده إدواك
إبغير إدواك ما يقنع ألمها......
إشجيرة برتقال إتحبك الروح
تريد إتسولف إلها إو دوم يمها
تحب ظلك إو حبها حيل مفضوح
تريد إتشمك إو تشبع إبشمها
اذا لحظه تقرر عنها إتروح....
تتسودن ولا تلبس هدمها......
واذا بالليل مرها كحل طرواك
الگمر يتكحَل إبمروَد نجمها...
وإذا ما يوم باست نور عيناك
يموت إوجودها إو يحيى عدمها....!
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!
السبت 17-11-2012
الساعة الثانية والثلث صباحا
سدني
استراليا