يا دمعْتي... قصيدة شعر شعبية..للشاعر :مسلم الطعان

يا دمعْتي...!
قصيدة شعبية
شعر:مسلم الطعان

يادمعْتي وحدچ ْ غريبه
مامشْ سوالفْ
يَمّچ إتطفي الجمرْ
من ينزرعْ فوگْ الخَدْ

الوادمْ ولا إلهمْ غَرَضْ
كلمنْ يسولفْ ويْ حبيبه
اوْ وردْ الشفايفْ
فاحْ عطره
اوْ بالمواعَدْ وَرَّدْ

إتفتَحَتْ بيبانْ الأَمَلْ:
عِدْهمْ
وإنتي وحيده
إتخيطينْ ثوبچ بالحزنْ:
بإبرة شمعْ
والليلْ ريحْ
اوْ بابْ حلمچ منسَدْ

يا دمعْتي حزنچ مَدْ
روجه إعلى روجه
وما يريدْ إينامْ بفراشْ الجَزِرْ
وإعلى الفَرَحْ يتوَّسَدْ

يا دمعْتي:
كلْ ظنّتيْ
إتفرحينْ مرّه
مرّه
وما أشوفجْ لابسه ثوبْ أسوَدْ

يا دمعْتي جَمرچ:
ولا مرّه نزَعْ ثوبْ الجَمرْ
يستحيْ ينزعْ جَمْرِته؟
لو خافْ حالِفْ
حالِفْ للأَبدْ ما يبرَدْ

يا دمعْتي الليلْ
كَحَّلْ:
إعيونْ الْينامونْ
إبمَروَدْ حِلمْ
وإعيوني من ذاكْ الزِغرْ
شِبعَتْ سَهَرْ
اوْ ما مرّه دَگْ بيبانْها
لو بالغَلَطْ چَفْ مَروَدْ....!