بردك حلو للشّاعر الجميل محمّد محمّد رسلان

بلحظة دفا محسود عم يدعي للبردان
ع الشـاشة و الأخبار و متقّـل حرامـو
مـسكين هالمسـؤول مشـغول بالإنسـان
جفونـو مَ فيـها تـنـام بيـقلـكن نامـوا
و نحن شعب مبسوط عا كل شكل بطران
فكرو ب عصـا موسـى تحقيق أحلامو
يا ريـحة المـازوت ياريت شـي فنجـان
سقــالله زمـانـو راح و ســقالله أيامـو
المدعوم مـو سألان مختـوم هالـخزان
المعدوم شـو خسران مختومـه أوهامو
دخلك ي برد تروح ت يدوقك الدفـيان
رجفت عضامي ودعوتي تايرجفو عضاموا
المسؤول عبّا معدتو من لقمتي أطنان
و خلّا العدالة بمنطقو ت يزيد أرقامو
بكرا العمر بيروح و بتنـتهي الأحزان
مننسى البرد هالكان و مننـسى آلامو
منوقف عند الله سوا و بيحط هالميزان
ما في فقير و لا غني .. سيّان قدامو
م.رسلان..