الأميرة ياقوت ـ للشّاعر المتمكّن "ذوالفقار الخضر"

جاني الرد من كغوفك
ياست بدور
وحتى يكمل معروفك
عمري مندور
سطعت بالنور حروفك
ريحا بخور

بذكائك يا حنونة/ي/
موهتي الحال
لو عندك متل جنوني
طاب الموال
عوصفك سرحو عيوني
وشعلتي هبال
أنتي زادي والمونة/ي/
ومضاتك نور

تأخرتي كتير عليي
وبالي مشغول
ومن وقت ندهتي عليي
جسمي مشلول
كنتي وحدك ضاويي
مافيكي أفول
محلى لفتاتك ليي
وعينك بتقول
انتي نجمة ضاويي
وقلبي مأسور

انقالو عنك مغرورة
الحساد كتار
شعلتي بقلبن تنورا
وشو صارو كتار
لما ضحكتي بالصورة
ضحك النوار
ولما عبستي المعمورة
مافيها تدور

لما اللي شفتك جايي
بنقلة الغزال
تسوسح فكري للغاية/ي/
وزفراتي طوال
وقلبي فوق التقلاية/ي/
وبراسي هبال
انتي ياقوت الحكاية/ي/
ورمشك مسرور
(الاميرة ياقوت والسياف مسرور)


يلي وجهك قصيدة/ي/
حروفا من ماس
وبحرا اوزانو جديدة/ي/
وكلا إحساس
ولما بكتب تغريدة/ي/
بيشتلقو الناس
تقولي واقف ع إيدي
العالم حراس
ويمكن حتى ببريدي
مفتش محصور

ذوالفقار حسن الخضر