تعرفوا على #القوزلة.. رأس السنة الشرقية.._ مشاركة : د.عبير حاتم.

#القوزلة.. رأس السنة الشرقية ..

* اليوم ... اقزل نارك ...

في اكتر من مصدر بيحكي عن أصل الكلمة .
- البعض بيقول انو الكلمة آشورية وهي من فعل ( قوزلو ) بمعنى إشعال النار . لأن كان يتم الاحتفال بـ #السنة_الفلكية_الجديدة بإشعال النار .. للإعلان عن البداية.

- البعض بيقول انو الاصل آرامي ..كمان من فعل ( قوزلو ) اللي بيعني بالآرامي إنهاء شيء والبدء بشيء #جديد .. وكانو السوريين القدماء يحتفلو بنهاية سنة وبداية سنة جديدة من فترة الألف التاني قبل الميلاد .. وكانو يقدمو القرابين والأضاحي ب 13 و 14 كانون التاني حتى تكون أيامهم وسنتهم الجديدة #خير و #بركة و #حظ_حلو ..

- وفي كمان مين بيقول انو الكلمة اجت من عبارة ( قوة #الله الأزلية .. #القوزلة ) وبيبلش الاحتفال فيها مع بداية الانقلاب الشتوي لما بيبلش النهار يزيد عن الليل ... وهاد دليل على القوة الأزلية .. وبتبلغ ذروتها بتاريخ 13 و 14 كانون التاني ...لما بيكون زاد النهار عن الليل ساعة ..

_ وكمان بيقولو انها ( قوة وزلة ) ... قوة للطيبين وزلّة للظالمين ...

- وكماااان في تفسير للكلمة بيقول إنها بتتألف من مقطعين:
قوز : كوز .. جرة الماء
لي : الله
وهيك بتكون الكلمة .. جرة الله (الأرض) اللي بيملاها الله بالمي .. الشتي .. وهيك بتبلش الشتوية الاصلية مع هاليوم ...

* الاحتفالات بأيامنا اختلفت بهالعيد .. بس من زمان كانت العيلة بالضيعة تربي خروف أو جدي منذ شهر أيلول للاحتفال بهالمناسبة .. وبيدبحوه قبل بكم يوم من سهرة القوزلة أو بنفس اليوم ... ويشووا اللحم باستخدام أعواد البطم بدل الاسياخ المعدنية لانو كان يعطي طعمة اطيب ...
وبالسهرة كانو يشغلو النار ويطبخو #برغل_بحمص ويعملوا الكبيبات والزليبة.. مع سهرة أغاني وضحك وتسالي ...

♡ كتار من الختايرة لليوم لما بتسألن عن شخص عمره 80 سنة مثلاً؛ أنه كم عمره هالشخص؟ بيجاوبوك : في ببطنه 80 قوزلة.
♡ القوزلة مو عيد ديني ... وإنما إرث سوري قديم ..
♡ في كتيرأاشخاص لسه لليوم بيحتفلو بهالمناسبة بسورية وجنوب تركيا ... محافظين على العادات الحلوة.
عيد مبارك عليكم يا كل الأوادم على هذا الكوكب المبدع ..بل التعبان.