تويت
الشاعرة المهندسة فايزة معماري
تغيرت أحوالنا
راحوا ال علمونا الحب راحوا
ومن بعد الشقا ناموا ارتاحوا
تركوا .... الهم والتعتير عنّا
مخيّم عالدني وفارد جناحو
كان الشب يتباهى ببيّو
ودوح الحب يجمعهم بفيّو
صار الخي يا دلّي بوجه خيّو
إذا مرّة غضب يسحب سلاحو
كان الرجل عن ارضو يقاتل
شهم وفارس خيول الأصايل
صار الحكي تلتين المراجل
وكل إنسان ديك بوسط ساحو
جف الياسمين ... ودبل فلّي
ونشفت نبعتي ما عدت ملّي
وما ضل ببيتنا إلا القلّة/ي
وعطور جنينتي ما عاد فاحوا
لمّا غاب طيف الحب عنا
مات الزجل فينا والمعنّى
وصار القلب متعذّب معنّى
وأهل العطف والإخلاص راحوا
نصيحة
إن كنّك بالنعم عايش مبحبح
إعطٍ .... والعطاء شوي بحبح
طير ال بالسما علّى تأرجح
وقع من فوق وانكسرت جناحو
تحياتي لكم أصدقائي أينما كنتم