قصيدة الناس معادن ..

....الناس معادن ......
مش كل عشره معاك تدوم
في عشره تملاك بالهموم
في ناس م العشره اتجمدت
صبحت صنم ملهوش لزوم
......
مش كل معدن يوم لمع
يصبح دهب او يتجمع
في حاجات بالضغط بتكشف
والقشره من فوقها بتقع
......
وفي ناس من كتر محبتك
تنساك وتنكر عشرتك
واذا حسوا ان إنتا ضعفت يوم
يقووا عليك في محنتك
......
الناس معادن في الشدد
مش بالسنين او بالعدد
في ناس تعاشرك من يومين
تصبح معاك ظهر وسند
.......
وفي ناس بتاكلك بالعشم
لحد ما تترسم وشم
وف قلبك صوره تطبع
تلقا المعامله بالغشم
......
وفي ناس قلوبهم زي حجر
نوعهم غريب غير البشر
وكل ما تيجي تحبهم
تظهر عنيهم بالشرر
......
الناس معادن بالنفوس
منهم على القلوب يدوس
ومنهم لما تنجرح
يوطي على جرحك يبوس


......محمد إبراهيم درويش.......