صباح ومسا

مع أنه احتلال بس ما بتقدر تعمل مقاومة عليه ولا ثورة ولا جهاد مقدس ولا أي حراك لا سياسي ولا دبلوماسي .. حتى لو حاول هالمحتل يطلع بحجة أنه هو انتداب وخلصت مهمته بالحركشة وقلب الموازين وشفط ثرواتك الباطنية والظاهرية ..بتشوف حالك ملزق فيه وبتمسك فيه بأربعتك وبتحس أنه روحك رح تروح لو طلع من جواتك مع انه احتلال .
هالاحتلال هو أثر حبيبك جواتك حتى لو راح ...الأثر مرات بيكون أهم .

ويا غافل إلك الله وع بكرة الصبح بتجي فيروز .. بتزيد طينة احتلال الحبيب بلّة وبتصير ما بتعرف ترابك ولا ترابه اللي جواتك .

"شو بدي دور لشو عم دور على غيره
في ناس كتير لكن بيصير ما في غيره
بس أنت ..أنت وبس ..بس أنت .. أنت وبس ."

بتشرد فيه ، هو احتلال ..بس مدري ليش طري وحلو واخد عقلك وملبك سماك ..لا بتعرف صبحك من مساك

" صباح ومسا
شي ما بينتسى
تركت الحب واخدت الاسى "

ومع أساه اللي ما بينتسى مبسوط فيه ورضيان .

وبيمر هالنهار ... ويا غافل إلك الله مرة تانية بتجيك الست ، ما غيرها أم كلثوم ، لتهز بمنديلها موافقة فيروز ..وبتأكد كأنها عم تزرع هالاحتلال بدمك ... يعني أين المفر ؟

"وإن كنت أقدر
أحب تاني أحبك إنت .

بعدين بتحس أنه عم تقول ليش المقاومة أصلاً وهو منك وفيك وبك وعليك .

"وأحب تاني ليه
واعمل في حبك إيه "

إي و بعدين ......؟!

مي عطاف