بْيِكْتُبْ ... بْيِمْحِي جوزف حرب – طَالعْ عَ بالي فِلّ

بْيِكْتُبْ ... بْيِمْحِي
جوزف حرب – طَالعْ عَ بالي فِلّ

مَرَّاتْ
بِشْلَحْ بِالشِّعرْ جِسْمِي الْ عَمِيْحِفُّو الهَوَا.
بِلْبُسْ شَمسْ،
يَمَّا بَحرْ،
يَمَّا
غِصنْ زَيْتُونْ.

وْيِمْكِنْ مَا إِلْبُسْ غَيرْ حَالِي. وْجِيبْ
إِيَّام الخَلْق تَا فِيضْ فِيْهَا وْقُولْ:
يَا هَـ الكَونْ
كُونْ.

وْإِسْمَع صْوَاتُو كِيفْ عَمْ يِتْحَرَّك.
وْإِضْجَرْ مِنِ الحَرَكَاتْ حَتَّى المَا حَدَا قِدْرَانْ
مَرَّه يِسْمَعَا، مِتل لسَانَات الشَّمعْ
يَا
رَفّ
الجْفُونْ،

وْنَقِّطْ عَلَيْهَا
سْكُونْ.