مَوتْ بُورْخِسْ جوزف حرب

مَوتْ بُورْخِسْ
جوزف حرب – طَالعْ عَ بالي فِلّ

يَا
مَرِيَّا
تْعِبتْ مِنْ إِنِّي حَكِيْم،
وْطِفلْ،
وِرْمَادِي،
وْشَبَحْ،

وِغْيُومْ كِحْلِيِّي
كِترْ مَ شْرِبتْ حِبرْ.

يَا
مَرِيّا
تْعِبتْ مِنْ إِنِّي بْفَكْفِكْ هـَ الحَضَارَه،
بِشْتِغِلْ بِالذَّاكرَه، وْبِكْتُبْ بِهَا للِّغَاتْ
تِعْوِيْزِي،
وْسِحِرْ.

يَا
مَرِيَّا
تْعِبتْ إِنِّي بْحِنّْ، بِتْنَاقَضْ، وْبِعْشَقْ،
وِالعَمَى الْ فِيِّي بِيخَلِّيْنِي حَزِيْن السُّخْريي،
مَحْرُوْمْ لَونِ اللَّيلْ، مِفْتَاح الحِلمْ، بِحَّارْ مَا بَعدْ
الوَقتْ، شَاقِقْ غِمقْ بَحر المَسَافي بِالعَصَايِي.

تْعِبْت مِنْ هَـ المَكْتَبِي اللِّي بِحْفَظَا مِنْ
كِلّْ تاريخ الدِّني، مْنِ الشُّعَرَا،
مْنِ الفَلْسَفِي،
مْنِ الدِّينْ وِالعَسْكَرْ.
مَآتِمْ يَا
مَرِيّا،
كْتِيرْ عَمْ بِلْمَحْ مَآتِم، وِسْكَاكِينْ
وْدَمّْ.
عَمْ بِلْمَحْ سُلالاتِي الِّلِ مِنْهَا جِيتْ عَ حْصَانْ
وْمَعِي سَيْف وْوَرَقْ.
وِالأَسْئِلي؟
مَصْلُوبْ رَاسِي فَوقْ كِلّ الأَسْئِلي.
هَادَا أَنَا؟
لأْ
مشْ أَنَا.
مَا في حَدَا مِنْهُنْ عِرِفْني:
مْرَايْتِي،
كِتْبِيْ،
ذَاكِرْتي.

يَا
مَرِيَّا، شْوَيّ وِبْقِلِّكْ أَنَا
رَايحْ لَعِنْدِي.
لَبّْسِيْنِيْ،
وِامْسَحِي وِجِّيْ بِإِيْدِكْ. عَطّْرِيْني.
صَوتْ صَوْتِي صَارْ جَايِي.
صَارْ وَاصِلْ.
وِالسّنِين الْ عِشْتْهَا عَمْ تِنْمَحَى تَا عُودْ
هَاكِ الطِّفلْ يَلِّليْ مَا كِبِر فِيِّي.
مَرِيَّا
لَبّسِيْ هـ الطِّفلْ،
ضَوِّي
شَمعْتو.

عَمْ حِسّْ نِتْفِي بِالنَّعَسْ. وِالبَابْ
عَمْ يِفْتَحْ مِتِلْ كَوْكَبْ، مَرِيَّا،
وْإِيدْ

جَايِي تَاخِدْني هَـ المَسَا
ع العِيدْ.