نْبِيدْ أَخْضَرْ جوزف حرب

نْبِيدْ أَخْضَرْ
جوزف حرب – طَالعْ عَ بالي فِلّ

شِفْت الشِّعرْ
قَاعِدْ
بِشَجْرَه
وَاقْفِي
تَحْتَا
تْرَابْ.

مَرْسُومْ فَوْقُو وَشيْ شِيْرَازيْ عَ سِجَّادِي
قَدِيْمِي
أَو
كْتَابْ.

وْهِيِّي إِيْرَانِيِّي صَبِيِّي مْحَجِّبَا
هَـ الصُّبحْ
بِغْطَيْطِةْ
ضَبَابْ.

شِفْت الشِّعْر صَايِرْ بِحَوْرِةْ نَبعْ
قَنِّيْنِة
نْبِيدْ

خَضْرَا،
طَوِيْلِي،

وْرَاقْهَا مَرْشُوشْ فِضَّة فَوقْهُنْ، مِتْل
الكَأَنَّا فَتّْ
كِحْل
الخِبزْ، أَوْ
سِكَّر العِيدْ.

وِالنَّبعْ نَاشِفْ تَحتْهَا عِطْشَانْ،
وِالدِّنيِي
غْيَابْ،

هَبِّت الرِّيحْ، وْمَالِت الحَوْرَه القَنِّيْنِيْ
عَلَى تِمّ النَّبع المْنَشِّفْ،
وْقَالِتْ:
شْرَابْ.