تويت
Muslim Al-ta'an
يا بَزّونه....!
قصيدة شعبية حوارية مابين ( أم جميلة ) والبزونه ( القطة)
شعر: مسلم الطعان
يا بزونه أعتذر من البزازينْ
أدوّر بالزِبِلْ ما عندي حِيله
أصيحنْ يا معينْ ومامش إمعينْ
وأنا المكًطوعه بس الله أشتكيله
چنت حلوة الطولْ وكحله بالعينْ
إخدودي إورود وآنه إسمي: أم جميله
عَقلي راح مني وين ما وينْ
أدوِّر إعليهْ او ما ظلّت وسيله
ذلّه اوْ جوع حملي صار حملينْ
وجنوني براسي تصهلْ دوم خيله
يا بزونه اشتكيلج وإنتي تدرينْ
عِليله ومن يشافيها العِليله
چنت إبحيلي أعادلْ حيلْ ألفينْ
هَسّه الحيلْ عندي راح حيله
أسمّي الألفْ (أصفر*) وأمسح العينْ
لأن كل دمعه أحسنَّها ذليله
وأصيح إبصوت (يَدِّي*) يا إمحبّينْ
وأحس ذلّيت والوّنَه ثِجيله
يا بزونه وحيده وأهلي مَيتينْ
او بيتي الشارع إبصيفه او جِحيله*
صرت بزونه آنه وناسْ شينينْ
يركبوني او يسوّونْ الرَذيله
لأن عقلي فقدته او طكًني البينْ
او حربْ الضيمْ ما تخلص طويله
چا وينه الشريف اليحچي بالزينْ
الطَلَع من ظهر أبوه وأمّه أصيله؟!
**ترد عليها البَزّونه ( القطة) قائلة:
ماعندچ حكومه : لا تعتبينْ
الحرامي إتهمّه بس ترسة شِليله
الحكموكمْ إزباله موش طيبينْ
ولَو حزبْ الزباله ننتميله....!
الخميس 30 تموز 2020
الساعة السادسة صباحا
صومعة السومري الغريب في سيدني
أستراليا
***إشارات....
*(أصفر) كلمة تستخدمها أم جميلة وتعني العملة الورقية فئة ( ألف دينار) التي تشحذها من الناس
*( يَدّي ) تلك الكلمة التي اشتهرت بها أم جميلة وتعني: ( يا جدي)
*جحيله: مشتقة من كلمة ( جحيل) وهي كناية عن البرد القارس في الشتاء
==========================
- دائما مبدع خالوا العزيز مشتاقين