تويت
هيثم أبو علي
محاورة بيني وبين صديقي الشاعر العميد حسن أحمد كتوب أرجو أن تنال إعجابكم.
هيثم
عم حاول اكتبلِك شعر
حروفو مغرٌقها بالعطر
حروفي عم تهرب مني
كتبتلِك ...بوراق الزهر
حسن
لازم ....... تعذرلا حرفا
دايخ .. من غمزة طرفا
لا تستعجل........ بوصفا
بتدوب .. زرازير الضهر
هيثم
دايخ .. ب عطر حروفك
وسحر طيوبك وطيوفك
شهرين......وناطر شوفك
متل الناطر.... صرلو دهر
حسن
مشتاق وربي مشتااااااق
وجمر بعادك... شو حراق
هالعمر بيمضى..... سرٌاق
بيسرق منا ..سنين العمر
هيثم
لو إنك.......مشتقلي بجد
ما بتلوعني........... هالقد
بكيوا عليك.... زرار الورد
والزنبق .... طق من القهر
حسن
الزنبق طق .. من خدودك
ريتا تسلملي ...... ردودك
يرحم بيك........ وجدودك
كسروا القالب بعدي كسر
هيثم
ريتو يسلملي ........ جدك
والورد .......ال على خدك
بالحلا ......... مافي بقدك
وباللطف..... بتغمرني غمر
حسن
الحلا بعيونك ........ هيثم
ومنك شعر ........... بتعلٌم
سبحان الأعطى .... وقسٌم
وخلى تراب البيدك...... تبر
هيثم
بحروفك ...... أنت الأحلى
وعا قلبي........ أنت الأغلى
أشعاري فيك ....... بتحلى
وبيتٌحلى ...... فيك الشعر
حسن
الشعٌار ال بعدك...... راحوا
ومات الشعر .... وأفراحوا
لمن أكلوا ............ تفاحو
هبطوا الأرض وداقو القهر
هيثم
ما في ولا شاعر...... متلك
وبالحسن... ما في بشكلك
وحدو الشعر ...... بيلبقلك
وبحروفك ضحكات الزهر
حسن
عم تغمرني .... بتشجيعك
حتى ....... اتعلى وطيعك
بيكفي إني........... سمٌيعك
بتلمٌس ....... ردات السحر
هيثم
أنت...... ما بحاجة تشجيع
وبحصنك....... عالي ومنيع
فنان .......... وذوقك رفيع
وبترسم...... بحروف العطر
حسن
عطري خدتو .. من حروفك
وسلاحي ... ضرب سيوفك
لو بتكمٌل ........... معروفك
وبتعلٌمني ........ شوية شعر
هيثم
أنت معلم ............. للشعٌار
وتلاميذك ...... صاروا كتار
عن بيك ........ أخدت الكار
وب ايدي ....... بمهرلك مهر
حسن
بشهدلك .......... بيي شاعر
بقٌر بشعرو ........... وبفاخر
حروفو در ......... وجواهر
ونخالة ............ انا عم هر
هيثم
أنت ............... لبيك طالع
شاعر............ وبصوتك قالع
بوجهك ....... أحلى المطالع
وبشعرك .......... بيفتٌح زهر
هيثم
من حروفك ... والله ما بمل
وبكلماتك .......... عطر الفل
لكن هلق .......... مجبور فل
بتلاقيني ......... بعد الضهر
حسن
ترجعٌلي ............ بالسلامة
بسرعة .... ع جناح حمامة
تا ترجعٌلي................ إلهامي
ويرجعلي ... شيطان الشعر.
29/6/2022
Elyess Kamal Krika
- **********************************
- أبو حسين
يتدفّق الشعر مترفاً من نبعين صافيين
عذبين
أتحفونا ياأحباب
طيّرتو منّا الألباب