تويت
صور اهل مصر زمان
مصطفى فؤاد أبوخلعه · ٢ يوليو، الساعة ١:٣٨ ص -2022م ·
الجماعة بتوع الأرياف بس هما اللى هيعرفوا الصور دى بتاعة إيه ؟؟
.
الصور دى يا حضرات كانت فى السبعينيات والثمانينيات .. ودول أنفار فرق المقاومة اليدوية بتوع دودة القطن .. وبيبقى معاهم الخولى .. وكانت أجرة النفر آخر كل مدة ( 10 أيام ) من الجمعية الزراعية تقريباً للنفر 10 جنيه !! يعنى اليوم بجنيه واحد
.
وكانت العيال مبسوطة وفرحانة وربنا مبارك لهم فى فلوسهم البسيطة من تعبهم .. كان العيل من دول يقعد يحلم ويستنى آخر المدة بفروغ صبر .. عشان يحوش ويشترى له معزة بعشرين تلاتين جنيه !!
.
أوعشان يشترى الجزمة البلاستيك البيضا اللى كانت تقليد الكوتشى بـ 2 جنيه !!
.
أو يشترى كورة ( كَفَر ) من أم جنيه وربع .. وكان يعمل عليها حفلة ويلم كل عيال العزبة عشان يتفرجوا عليها .. والعيل اللى ضوافر رجليه طويلة ما كانش يخليه يلعب معاه من خوفه على الكورة ليلطشها ضافر يقطعها
.
أو يشترى مترين تلاتة قماش كستور مقلم ويوديهم يخيطهم بيجامة وبنطالون عشان يلبسها وهو صاحى وهو نايم وهو جوه الدار او برة الدار
.
والصورة التانية دى صورة طيارة رش القطن بالمبيدات .. المطار بتاعهم كان قريب من القريه .. كانت تنزل ترش بالشكل ده كدة لما تلاقى الرايات البيضا على الجسور
.
ولما تلاقى الرايات الحمرا تبطل رش وكدة معناه إن الإصابة راحت خلاص .. أو تدل على وجود مناحل عسل او وجود مزرعه مواشي او مزرعه فراخ
.
وساعتها ما كنتش تشوف ناموسة ولا دبانة وكان يحلى السهر واللمة على ضى القمر بالليل .. كانت أيام !!
- عبدالحميد الضحاوى
ياريتها دامت والله كانت ايام خير وبركة وسعادة