تويت
Galal El Missary
٣١ مايو،2022 م ·
+10Hithem El Sayed
٣١ مايو، الساعة ٨:٠٢ م ·
فكرت مرة حلقة التليفزيون اللي بتشوفها بتتكتب ازاي أو بتتعمل إزاي ؟
- طب هل فكرت مرة انك تشتغل صحفي ؟
- طب ايه هي مواصفات الصحفي الشاطر ؟
- طب لو بتنقل خبر عن عدوك .... تنقل الخبر زي ماهو ولا تطلع عدوك شيطان حتي ولو بالزيف ؟
- طب هل فكرت مرة ان الكاميرا ممكن تكون سلاح يدافع عن الحق ؟
- وهل فكرت ايه هو المطلوب عشان تطلع صورة حلوة ؟
الأسئلة اللي فوق دي و أسئلة ضعفها مرتين تلاتة جاوب عليها الأستاذ أحمد الليثي الصحفي الجميل الكبير مدير تحرير موقع مصراوي وأحد أهم ومؤسسي فريق إعداد برنامج معكم الشاذلي واللي غطي الحرب في غزة واللي خد جايزة أفضل صحفي في الوطن العربي واللي بيحاضر صحافة واعلام من سنين و اللي عنده قايمة انجازات محتاجة بوست لوحدها... الليثي قطع مسافة ٣ ساعات ذهاب و زيهم ٣ عودة عشان ييجي لنا أقصي أطراف الشرقية تحديدا قرية دوامة اللي بتبعد عن القاهرة حوالي الليثي قطع المسافة دي عشان يقعد مع ولاد وبنات القرية ويحكي لهم ان الأحلام مش مستحيلة ويقول لهم ان لازم يكون عندك مبادئ في الحياة وانك هتتعب شوية عشان تتمسك بيها لكن لازم تمسك فيها وان الأهم انك تكون متفرد في اللي بتعمله
الليثي اتكلم مع الولاد ببساطة ولغة مفهومة وحكي لهم عن الفنان خالد صالح اما شافه في البرنامج وحكي لهم عن فريق التمثيل بتاعه في الجامعة
بعد الليثي ماخلص دخل الي أرض الملعب خفيف الظل والروح الفنان والراجل اللي تشوفه وهو بيتكلم ويعمل القفشة تشعر ان عنده ٢٠ سنة... الدكتور جلال المسري... الفنان العالمي واللي لبي الدعوة من غير تردد ونزل من قطر النوم بعد سفر ١٤ ساعة وركب العربية وسافر لنا الشرقية ٣ ساعات عشان يصور الولاد صور حلوة ويعمل لهم محاضرة يقول لهم فيها ان التصوير مش مجرد لقطة تفرحنا وبس... ويقول لهم ان الكاميرا سلاح بيساند الحق وأداة لالتقاط الجمال واللحظات الحلوة في الحياة... ويقول لهم انه بامكانيات بسيطة ممكن تصنع صورة حلوة..
جلال المسري اللي بيحاضر في أهم جامعات مصر واللي أخد جوايز عالمية من حوالي ٢٠ دولة واللي صوره بتتعرض في كل العالم واللي صوره علامات في تاريخ ناشيونال جيوكرافيك واللي بيحكم في أهم الجوايز الدولية... قعد وسط العيال وضحك ولعب وهزر وصورهم وهو مبسوط وقبل مايمشي قال لهم صوروا كتير وابعتوا الصور لهيثم ونختار افضل صور ونبعت لاصحابها هدايا عظيمة
أنا محظوظ بالأصدقاء دول جدا... ناس بتؤمن ان الكلمة ممكن تغير حياة ولد أو بنت و ممكن تاخده من الضلمة للنور ومن القبح للجمال
عايز أقول لكم بس في الآخر ان الدكتور جلال ما قدرش ياكل غير ٧ صوابع محشي وحتة بطة حوالي ٢٠ جرام... لكن أنا عملت الواجب و أكلت لهم... دول ضيوفي
افتحوا الصور.... هتتبسطوا
ملحوظة : مفيش صور للبط أو المحشي