واسع بساط الوقت للشّاعرة ميسا حلبي

وَاسِع بْساط الوقت. عندي كان
وِمْزيَّن بْأحلام مغزولةِ
وْلا كان مرّا هالْفكر حيران
وْلا عن هْموم النَّاس مسؤولةِ
كان هَمِّي دَفْتَري الزعلان
وْ نَهْدة بِعطْر الروح مجبولةِ
لمّا حبيبي يْشلّق الجيران
بِوْرُود عَ الشّبّاك مشكولة
بِلْبِس مِن مْروج الْحلا فستان
يِلْبَق لأغلى عْيون ضحكولي
وْخبّي الْوقت... بْدرفة النسيان
وْوصّي المرايا تْقول.. مشغولةِ
وْتضْحَك عْيونو للحلو الْعتبان
وْنار البعد عَالسكت.. يشكولي.
صار الوقت متل القلب تعبان
وْأوجاع بالْأوجاع موصولة
بْعلمي على مْطَل الأمل سهران
وَلّا هجرني وْقال .. عدّولي
كان الحكي لمْحبّتُن عنوان
ما ضلّ عندي وقت للأحزان
وْلا ضلّ عندن وقت يحكولي.....
ميسا