تويت
الشاعرة فردوس النجار
قالوا رِجِع : (زجل)
قالوا : رْجـِع !!...
قالوا : انسَكـَب بالغيم !!......
_حْضـَّرْت الـْقـْناني وُصْرِت..
إعْصُرْ ندى وُتـَرنيم...
وُحْضـَّرت حْرْجْ من الورد..
وُفـْتـَلـْتْ متل الريم....
وقلبي غشي...
شاف القـُزَح قـَوسَين..
صار البحر كـْلـُّوْ مَدَدْ..
غـَطـَّى الوَجَع والضَّيم
ومتل الحلم شفت القمر..
حايم على سْروري..
قـَمْقـَم حمام ..
وُعَشـَّشْ الدُّوري
سمـَّيْتْ بسم الله وصرت..
أطيب من عطوري !
يا ريت تـْصْدُق كذبتـُن..
يا ريت تعلا حكايتـُن
يا ريت يبرُق بالصَّحو..
(شَفـَّاف ما عم إلمحو)
قاعد بقلبي..
لا ثقيل ولا خفيف..
متل النبض..
عم يرقـُص...
وُوَقـْعُو لطيف !
صمتو طويل ..
وناطر سْراب الحَجَل
..والدرب عم يغلي ..
وغرامو شو عنيف!
ولا كان يتـْهـَدَّى...
وُ لِـبـِسْ كل الصبر..
تلجو غـَمَرْ تـَمُّوز ..
وفستاني شفيف
قالوا : رِجـِع معقول ؟...
معقول يَلْ إنتَ أنا ؟!
كيف انقسمنا ؟..
وأيمتي ضاع الجَنـَى ؟
كيف انقـَسمنا ؟..
وُ شـْرفـِتـَكْ عيني !
وانتَ العمر ..
يَلْ حاملو جبيني !
شال الزهر ..(هْلْ بَشـَّرْ بنيسان)..
شـْلـْتـُو بـِإيدَك..
من تكاويني !
_ بـَسْ..
استحي معقول؟!
شوباك كل شوي تكسرني؟
والمغزل ِ يْشـدَّكْ على عيني !
مْقـَلـْقــَز بقلبي..
مْلـَبَّكْ وخـَيفان..
وإيدَك بـِشـَعري..
تـْقول خـَلـِّيني!
روح وُتـَعَا ..
عا قـَدْ ما في مَي.. بالكـَون كلـُّو..
ما بيغويني..
إلا لـُقاكْ يْعَرِّش بْعُمري
والشـَّوق يكبَر..
والحكي يقصَر..
وتسرقني مْنـِّي ..
تقول بوسيني!
*****
دمشق: فردوس النجار