حكت هند رستم حكاية.أحد المعجبين بالفنان فريد الاطرش واسمه طه وجاره بالزمالك

لما اتنقل فريد الاطرش وسكن فى الزمالك ، كان فيه واحد يستنى معاد نزوله كل يوم ويشوفه من بعيد لحد ميركب عربيته ويمشى .. وفمرة حاول يقرب من عربية فريد يسلم عليه فحارس فريد رفض ونهره ، البواب لاحظ ده فنادى على الراجل سأله فالراجل قاله ( انا طه موظف فصيدناوى وبحب الاستاذ فريد قوى ، ولما عرفت انه سكن هنا وانا ساكن على سطح العمارة اللى وراكم هنا .. بقيت اجى اشوفه وهو خارج رايح حفلاته ) .. البواب فى مرة كان بيجيب طلبات للاستاذ فريد فحكاله قصة الراجل اللى بيحبه ده وقصة الحارس معاه
فوجئ بفريد بيقوله تعالى .. ونزلوا راحو العمارة اللى وراهم وطلعو للسطح .. فريد قاله اندهله ، البواب قعد ينده ( يااستاذ طه ) .. فطلع الراجل مذهول بفريد اللى اخده بالحضن وقاله ( الحارس مكنش يقصد يزعلك هو بس متوتر ، وانت كل يوم بتجيلى فالنهاردا اجيلك انا ...حبك ده وسام .. وبحبك ده انا موجود وبستمد القوة) .. حكت هند رستم الحكاية ، وحكت مريم فخر الدين عن فريد لما كان معزوم عندها مع جمع من الفنانين ، ووصل البيت بس اتأخر فى الطلوع ، فنزلت تشوفه فلقيته بيغنى للبوابين والشغالين فالعماير إللى حواليها ، لما اتلموا حواليه يسلمو عليه وهو فى طريقه يطلع لمريم .. دى تصرفات نجوم .. استحقوا بيها يعيشوا ويتخلدو نجوم على المستوى الانسانى قبل الفنى ..
الصور اللى تحت من حفلة امبارح لعمرو ادياب بيصفع شاب بالقلم على وشه لانه تجرأ وحاول ياخد معاه سيلفى .. الولد ده مقصدش يضايق عمرو ولا يتعدى مساحته ولا يشده لأنه عارف حجم الحرس والمنظمين مع عمرو .. هو بس حب ياخد صورة مع النجم اللى بقى نجم بحب الولد ده وغيره ، ولما خد القلم مشى فى انكسار دون اى رد ، كما نتذكر جميعا الفيديو اللى كان بينده فيه على سائقه الخاص ووصفه بالحيوان ..
عمرو نجم كبير ومن حقنا نزعل منه ولا اظن لو عمرو بيحيي حفل فى الرياض او زفاف بدبي ، ومعجب قرب ياخد معاه سيلفى وتصرف بعفوية غير مقصودة زى الولد ده ، معتقدش عمرو كان هيضربه بالقلم ..