تويت
قصيدة: وَردة سِبحتي...!
قصيدة شعبية
شعر: مسلم الطعان
بيشْ أَلمَّنْ عَنَبْ وكتي
وآنه من ذاكْ الزغر ْ:
كلْ دقايقْ عمري إِعناكًيد ْ
والتگطعني إديهمْ
بيها يلتّذونْ وآنه الجَمُرْ لَذْتي
اَشتلْ إِهروشي وأَشوّفهمْ:
خضاري
ومايْ گلبيْ دومْ جاريْ:
إسواجيْ طِيبه دومْ إلهُمْ
حتى تُروَى إِشفافهمْ
ومني بيَّ اللّيْ رووا:
من مايْ گلبيْ
إوْ فَطرّوا بالعِطَشْ شِفْتي
ومنّي بيَّ الفرهدوني
وباعوا إِعلى الغيرْ سَلتي
ومنّي بيَّ:
الفَصّليت إِقماشْ روحيْ:
إِثيابْ إِلْهُمْ
و تاليْ خَلّوني
على إفراشْ الحِزِنْ:
إمشكًكًات إِثيابْ روحي
و ما سترني غيرْ وَنْتي
ومنّي بيَّ:
الچانوا إِيجوعونْ
وآنه أخبزْ بروحي
إِو تِستويْ إلْهُمْ گُرصتي
تاليْ من جَوَّعني وكتي:
لشوفهمْ
حَطّوا إبإِيديْ جَمرتي
هيچي من دونْ الطوايفْ
يا بَخَت بسْ جَمر حُصتي؟!
بيش أَلمّن يابَخت ْ...؟!
و شَردْ ألمَّن يا بَخت ْ...؟!
وآنه من دون الخَلَگ ْ:
عاندني بَختي
شَردْ ألّمَّن يا بَخت...؟!
وبيشْ ألّمَّن يا بَخت...؟!
وآنه من دونْ البَختهمْ:
گعَدْ إلْهُمْ
نامْ بَختي
و شَردْ أَدوِّر ْ يا بَخَت ْ...؟!
مو تعبت من الدِواره
دَوّريت وما هو بَختي
و شَردْ أَلّمَّن ْ يا بَخَت ْ...؟!
صار ْ بَختي نَهَرْ يابسْ
والنوارسْ:
چانت إمشرغِده إبضفتي
صارْ بختي نَهَر يابسْ
ثاجبه النيران بيَّهْ
ومامشْ أُميَّهْ
مامشْ أُميَّه أبخْ بيها حُرِكًتي
شَردْ ألّمَّن؟!
غيرْ آلامْ اللياليْ
و ضيمْ حاليْ
والشرود الصابْ باليْ
و تاليْ تاليْ:
أرد ْ خاليْ:
إلا من ضيميْ وعذابيْ
إِوْ حَسرتي إِوْ وحشة غربتي
وبيشْ ألّمّن...؟!
و شَردْ ألّمَّن؟!
مني بيَّ:
الطَّشروا خِرزات ْ عُمريْ
إوْ حِركًوا إِخيوط المَحّبَّه
إوْ ذَبّلوا وَردة سِبحتي...!
السبت الموافق/30/5/2020
الساعة السابعة صباحا
صومعة السومري الغريب في الكوفة