تا إرسما للشّاعر عبـَّاس سليمان علي

بالطـّيفْ بدّي إرسما
وإغفا على جناحْ القمرْ ..
تا إحلما
وْ رحْ زوزقاُ وْ رحْ زركشاُ ..
وْ رحْ رَوتشا
وْ إرسمْ على شْفافي حكي ..
تا وشوشا
وْ عـَكتافها بـْ خلّي الشمسْ ..
تفردْ خيوط الضّوْ فوقاُ وْ تفرشا
ميلهْ على كْتافا اندلقْ شلاّلْ
ميلهْ ..
الضّوّ يلفِّ عنقا بشالْ
وْ إرسمْ حكي .. إكتبْ شعرْ ..
ممنوعْ بحروف الحكي يـِنقالْ
وْ ممنوعْ حتى بـِ الوَما
بـِرسمْ حكي .. بـِرسمْ شعرْ
وشفافها تدلق خمر
شْفافي أنا ..
تدلقْ حكيُ وْتدلقْ شعرْ
تا تـِطبعو عـَ مـَبسما
= ســ 00000ــورية ـ عبـَّاس سليمان علي