يا عيد للخالد في الأرواح "سامي محفوض"

يا عيد يا طالِل علينا عيد .. نور المحبِّة ونفحة الوجدان
تا يلبس الإنسان توب جديد .. ويرجع نبي بـِ مْحَبِّة الإنسان
.
يا عيد صارو قْلوبنا بْواريد .. خرطوشْها من مصنع الأديان
وزْنادها شيطان عم بيصيد .. يَلِّي بِخالَف فكرةت الشيطان
وْخَدِّ الزَّمن معجوق بـِ تْجاعيد .. بْنات القهر وسْوالِف الأحزان
حيران من صوت وصدى زغاريد .. عرس النِّفاق وزقفة الطّرشان
والـ كان يسقي بالمحبَّة نبيد .. صاير بـِ كاسات الحقد سكران
.
لون الفرح يا عيد صار بْعيد .. من قيد سجَّان الفرح هربان
نسيان عَ دروب الحلا مْواعيد .. عم تنصلب عا خشبة النسيان
.
(كل عام وانت بخير) شو بتفيد .. للِّي نتَف ريشو الفقر، طفران؟
عندو عرايا، بيكفرو بالعيد .. لـَ تْظنّ فيك بيفرح العريان
جوعان ما عندو سمن وسميد .. معقول فيك يْرحِّب الجُّوعان؟!!!
ملّ القلم من كترةت التقييد .. عا دفتر اللَّحَّام والسَّمَّان
وساطور خوف يْوجِّه التَّهديد .. يمكن رقبتَو صارت القربان
.
يا عيد رغم الهَمَّ والتنكيد .. باقي أمل يِتْصَلَّح الميزان
ويفيق صوت العدل حتّى يْعيد .. نبض الفرح بقلوبنا عمران
ونشوف بِعيون العقل تجديد .. «منهج ثقافي» مْعمَّم ومنصان
وغربال، فَنَّ الغربلة بيجيد .. فرز القمح عن حبِّة الزِّيوان
.
يا عيد من فقه البطولة نْريد .. شجعان تحفظ قيمة الفرسان
عنَّا بـْ أرضنا خِيرة صناديد .. ومْسَلَّحة بالرُّوح والإيمان
من نوُرْها الأنوار عم بتزيد.. أرواح عملت بالسَّما طوفان
تـَ تْعيد يا هالعيد فقه جْديد .. فيه التقى الإنجيل والقرآن
.
[سامي محفوض]