سرّ العيد للشّاعر عبد الحميد ملحم

بقلك سر؟؟
عندي قلب بعدو جديد
ناطر جربو عالعيد
وصرلي ناطر من وعيت
بستنا.... وبستنا
ولهلق ما اجاني العيد
بقلك سر.... ياحلوه ؟؟
حياتي كلها اسرار مكشوفي
قصايد أكلت حروفي
وياخوفي
يكون العمر
قصيدة شعر محترقه....على الأحباب
ومدفونه بشي ورقه.... بطي كتاب
وعلى شي رف مشلوفي
بتستنا
يجيها العيد
عسى شي إيد
تمسح عن خدودا الناعمه الغبرا
وعسى شي عين
تجبر خاطرا وتقرا....
القصيدة الناطرة هالعيد
ولهلق ما اجاها العيد
بقلك سر؟؟
صرلي عمر
عم رتب لقلبي باقة مواويل
لحتى بس نتلاقا
اغنيلك على نغمة... صبا.... ياعين
وتغنيلي على نغمة..راست....ياليل
ومر الليل.... ألف مره
وألف نهار
عتق ها لقلب
بدرب الحب
بيستنا... ويستنا
ولسا ما ابتدا المشوار
ناطر بس يجي هالعيد
وهلق تا اجا هالعيد