تويت
مدينة المنصورة
أنشئت مدينة المنصورة في نوفمبر عام 1219 من قبل الملك الكامل ناصر الدين محمد بعد احتلال الصليبين لدمياط ، المدينة عريقة اصيلة وذات تراث وتاريخ اثرى كبير جداا (واتحدث هنا عن مدينة المنصورة فقط ) وليس محافظة الدقهلية لان ف بعض القرى التابعة للمحافظة وخارج نطاف مدينة المنصورة يفوق تاريخها الالف عام ، كان يطلق علي المنصورة اسم "جزيرة الورد" لأنها كانت محاطة بالمياه من ثلاث جهات وكانت بها أكبر حدائق ورد في مصر وقد ذكرها تقي الدين المقريزي في خططه.
- الكاتب هنا ف الكتاب ده بذل مجهود كبير جداا ع حد قوله ف مقدمة الكتاب بحث ف عشرات المراجع العربية والاجنبية والمكتبات العامة ودار الوثائق القومية والخرائط حتى تواصل مع جامعة تكساس ع يحصل ع خريطة نادرة لمدينة المنصورة تواصل مع الاجانب اللى كانوا عايشين فيها زمان او اصلهم منصورى واستمع الى حواديت كبار السن اللى عايشين فيها ونظرا للمجهود ده واللى بيتعدى ال500 صفحة فاز بجائزة النشر الاقليمى بوزارة الثقافة وحكى الحكاية فى كتابين .
** تجد ف الكتاب الاتى : ( الكتاب مليان احداث وحكايات كتيرة بس حاولت ألخص واختصر جداااا و ع قدر المستطاع )
- كانت تعتمد المنصورة ف حضارتها وشهرتها على جمالها وده كان السبب ف تخريج شعراء الرومانسية المصرية زى ابراهيم ناجى ، على محمود طه ، صالح جودت ، محمد الهمشرى
- اصبحت المنصورة بعد توسعها عاصمة للدقهلية عام 1527 وبعد ماتم انشاء خط سكة حديد يربط بينها وبين الزقازيق عام 1869 انقلب حالها لتصبح مدينة تجارية وسحبت البساط بقوة من تحت اقدام دمياط وانشىء اول كوبرى سكة حديد يمر ع النيل وبيعدى ع مدينة طلخا عام 1893 وافتتحه الخديوى عباس .
- المنصورة ثالث مدينة مصرية تدخلها الكهرباء وده حصل بعد ما تم انشاء اول شارع من نوعه وهو شارع السكة الجديدة ثم شارع عباس ( العباسى ) .
- ونظرا لتدفق الاجانب ع المنصورة وخاصة اليونانين والشوام تم انشاء المحكمة المختلطة للاجانب كواحدة من ثلاث محاكم ف مصر كلها ( مبنى المحكمة لسه موجود ف شارع المختلط حتى اليوم ).
- المنصورة شهدت بعض احداث ثورة 1919 وكان اشهر حدث تم ف يوم الثلاثاء الحزين ف 18/3/1919 التى جرت احداثه امام القنصلية الانجليزية بالسكة الجديدة وف الكتب ملخص للحكاية مرفق بعض الصور النادرة .
- المنصورة اخف مدن مصر دما واطيبها هواءا واجملها نساءا وربما يرجع ذلك كما جاء ف وصف المؤرخين السابقين اشتغال الفرنسيين خدما لدى الفلاحين لاول مرة بعد الحرب ولكن اغلبهم اعتنق الاسلام وتزوجوا بنات الفلاحين وانجبوا نسلا لعله السبب فى شهرة المنصورة حتى وقتنا هذا وميدان الطميهى والذى يرجع سبب تسميته الى الشيخ الطميهى الفرنسى الذى اسلم وسكن المنصورة يشهد ع ذلك .
- وقعت في أجوائها معركة المنصورة الجوية في 14 أكتوبر 1973 وتعد هذه المعركة من أهم المعارك الجوية العربية إذ كان لها دور كبير في انتصار مصر في حرب أكتوبر 1973.
أ) اهم معالم المنصورة :
1) شارع السكة الجديدة : قاربت تكلفة انشاؤه ع حوالى 16700 ج بطول 1360 م ورأوه كأوسع شوارع العلم رغم ان عرضه لم يتجاوز 11 متر وقال عنه الكاتب انيس منصور انه "اوسع م الشانزلزيه ف باريس واكسفورد ف لندن وفياناسيونالى ف روما " وكان يُعتقد ان العالم كله قد تم اختزاله ف هذا الشارع وتلاقى ف الشارع بقالة منداليس وصيدلية جينارى ومطبعة ايفون فنيارى ومحلات فيتا كوهين ومكتبة باباسطيفانو وصيدناوى ومبنى بنزايون وبعض مبانى عائلة صعب اللبنانية وكان الكلام ده وصف ليونانى اسمه سيروز كيدوناكيس ف مذكراته بالاضافة الى 20 محل تدار بواسطة اليهود فكان هذا الشارع اوربيا بمعنى الكلمة وف الشارع تجد :
· كاتدرائية العذراء والملاك ميخائيل والتى بنيت ف 1868 وجمعت 6 ابرشيات منها ابرشية فلسطين واصبحت المنصورة مركزا لهم وسميت الكاتدرائية بابرشية الكرسى الاورشليمى
· كنيسة الجالية اليونانية وبالمناسبة توفى الخواجة طاسو اخر يونانى بالمنصورة ف 2016 ولحد الان يأتى بعض السياح اليونان لهذه الكنيسة وكنيسة القديس اثناسيوس تم بنائها عام 1869
2) سوق الخواجات : والتسيمة ترجع للتجار المغاربة وكأنه مركز تجارى عالمى ولحد الان سوقه يجذب الفقير والغنى بما يحويه من مستلزمات عرس واداوت منزلية واقطان وغيره وبالسوق عدة مساجد تاريخيه زى:
· مسجد ومقام سيدى محمد النجار اللى اتبنى ف العصر العثمانى عام 1700 م تقريبا واتهدم عام 2017
· جامع ادريس واللى فقد عراقته وجماله بعد التجديد بشكل سوقى
· جامع الشيخ ريحان وده اصله م سوريا وكان تاجر حتى اصبح شيخ شيوخ السوق ومن مؤسسى نهضته
3) شارع الصيادين : وكان يسكن بالشارع الصيادين وبعض الامراء المماليك من بعدهم زى الامير حسن ، الامير مصطفى ارناؤوط ، والامير سليمان جلبى وفيه تنوع دينى فريد زى ضريح الشيخ شنك : اللى كان يعمل بالمقاومة ضد الفرنسيين كنيسة الطائفة الانجيلية ، حوش اليهود وكان عبارة عن منزلين تمتلكهم الست شرابية بنت نور الدين المرغبى تؤجرهم ليسكن فيهما الاعداد القليلة من يهود المنصورة ف القرن 18
- من المشاهير اللى اتربوا ف شارع الصيادين حسن الامام والذى اطلق عليه لقب مخرج الروائع حيث اخرج العديد م الافلام الشهيرة وكان يحلو له جعل المنصورة مسرحا لاحداث افلامه كما فعل بعده المؤلف اسامة انور عكاشة .
4) شارع بور سعيد : هو قلب المنصورة النابض رغم حداثته ولكن بعض جنباته تحتوى على احداث عريقة مثل معركة المنصورة عام 1250 ضد الفرنسسين وكانت نساء المنصورة لهن دور قوى ف المعركة كانت تقمن بسكب المياه المغلية من فوق اسطح البيوت فوق رؤوس الفرنسيين ويقال ان قائد الفرنسيين (روبير دو آرتوا ) قتل ع يد طفل م المنصورة وفيه بعض المبانى التراثية زى دار ابن لقمان ومسجد الموافى اللى يعتبر من اقدم مساجد المنصورة قبل هدمه واعادة بنائه ونظم احد الشعراء حين زيارة الخديوى توفيق للمسجد وصلى به الجمعة :
وقام للصلاة يوم الجمعه ... والناس لانتظاره مجتمعه
وجاءنا بالعز والعوافى ..... ف مسجد يعرف بالموافى
- شارع بورسعيد مليان ابنية تراثية ف عجاله زى ( مسجد الشيخ المصرى اللى اصبح اسمه مسجد الجمعية الشرعيه – كنيسة مار جرجس – مدرسة فريدة حسان اللى كانت مقابر الاروام الكاثوليك – المدرسة الايوبية واللى كان مكانها مقابر الروم الارثوذكس – جامع الجوهرى- زاوية سيدى العريان وتحتوى ع ضريحه وكان له مولد ( واعتقد ان عادل امام اللى اصله م المنصورة جاب سيرته ف فيلم امير الظلام بناء ع وجوده اصلا )
5) شارع العباسى : كان الخديوى عباس حلمى الثانى على عداء مع الانجليز فقاموا بخلعه من حكم مصر عام 1914 تعاطفت الجماهير مع عباس وخرجوا متظاهرين يهتفون (الله حى عباس جى ) وعندما زار عباس المنصورة ف بدايه حكمه افتتح الشارع واتسمى ع اسمه وبعد ثورة يوليو اتغير الاسم ليصبح شارع مصطفى كامل وتقريبا ماحدش يعرف المعلومة دى الا نادرا ولحد الان لا يعرف الشارع الا بمسماه القديم العباسى .. والشارع مليء بالحارات العتيقة اشهرها ( حارة العسل والدولتلى والبهلول والطميهى وجامع الكنانى وقصر امينة هانم زوجة الخديوى واللى اتهدم وشهد الشارع احداث مهمة اشهرها مظاهرات الدستور ايام النحاس باشا وتوفى العديد من ابنائه ووثقت الكاتبة لطيفة الزيات هذه الحادثة فى مذكراتها) .
6) كورنيش النيل ( شارع البحر الاعظم ) : ف عهد الملك فؤاد تم رصف الشارع وافتتحه عام 1920 ومن اهم معالمه : كوبرى طلخا اللى يرجع الفضل ف انشائه الى عثمان باشا محرم واللى حوكم لانه انشأ هذا المبنى والكتاب فيه ملخص للحكاية .
- ف الشارع بعض الجزر والحدئق الشهيرة زى حديقة فريال ف الخمسينات وجزيرة الورد وشجرة الدر والكازينوهات زى كازينو تانتوس والشجرة اللى ذكرت ف بعض الاعمال الروائية لبعض الادباء زى الاديب محمد كمال وابراهيم فرغلى اما صخرة الملتقى الشهيرة بشعر جماعة ابوللو هى صخرة ف المنصورة ع ضفاف نيلها .
7) شارع المختلط : وهو شارع عريق جدا كان اسمه شارع فريدة حسان اللى كانت اول سيدة من الوجه البحرى تتخرج من كلية الحقوق واول من مارست مهنة المحاماة خارج القاهرة ( اذا سرت يوما بشارع البحر العجوز وقادتك اقدامك الى عمارة الجمل والتى يوجد اسفلها بنك ناصر الاجتماعى ونظرت الى بوابة العمارة ستجد لوحة صغيرة لاتزال بمكانها منذ اكثر من 50 عاما كتب عليها " مكتب فريدة حسان المحامية " )
بشارع المختلط اكثر من 20 عقار ومبنى ادارى مسجلين فى قائمة المبانى التراثية بالمنصورة وهذا رقم كبير جدا ف شارع واحد ولك ان تعجب لما تعرف ان الشرارة الاولى لثورة 19 كانت من المختلط بالمنصورة ويشهد عبد الرحمن الرافعى على ذلك ، بالشارع قصر الخديو ومرسى قصره وقد تحول الى مكتبة عامة وقصر اسكندر
8) جامع الصالح ايوب : مسجد عريق هناك اقوال مختلفه ف تاريخ انشائه والاقرب ف 1249 وكان المسجد هو المسجد الرسمى لمدينة المنصورة يزوره الحكام والوزراء قبل ما يبقى مسجد النصر مسجد المدينة الرسمى
9) مسجد النصر : المسجد الرسمى الان لمدينة المنصورة كان كوبرى ( الكوبرى الاخضر ) يمر ع النيل ( شارع الجيش حاليا) ويربط بين ش المديرية وكفر البدماص والمسجد ده حديث جداا انشىء ف السبعينات وخطب فيه بعض المشايخ الشهيرة زى الشيخ الشعراوى وعبد الحليم محمود وجاد الحق اللى من بطره .
ب) قصور المنصورة :
( اولا لازم تعرف ان البناء كان بيتم ع طراز النسق الاوربى قديما بالمنصورة وهايتضح ف الاتى) :
1) قصر محمد بك الشناوى : (اكتمل بناؤه ف 1930 ) استعان مالكه بفريق من المهندسين والمعماريين الايطاليين على طراز الباروك او الروكوكو بمساحة 441 متر وحديقة مساحتها 4164 متر وحصل القصر على جائزة من الرئيس الايطالى موسيلينى كأجمل القصور الايطاليه ف الشرق الاوسط شهد القصر احداثا تاريخية الحكايات موجودة تفصيليلا ف الكتاب زى حضور الفنان عبد الوهاب ومصطفى النحاس وغيرهم وكان يلقب ببيت الامة المصرية ف الدلتا
2) قصر محمود سامى الطيب:بنى عام 1920 ليكون سكنا له مع زوجته خديجة هانم طلعت حرب ابنه الزعيم طلعت حرب يقع هذا القصر امام المستشفى العام اللى اصبح مقر لكلية رياض الاطفال بعد ما كان مقر لادارة الجامعة حتى 2009
3) قصر محمود الشناوى : اللى كان تحفه معمارية ع الطراز الحديث
4) قصر ابراهيم الشناوى ( مديرية الامن القديمة ): اكتمل بنائه عام 1928 وكان ع ناصية ترعتين لان النيل كان بيمر من امامه قبل ردم شارع الجيش وقناة السويس كانت مساحته 5000 م للمبنى والحديقة ع طراز النيو باروك والقى ف القصر جمال عبد الناصر خطاب 1960
5) ولا ننسى بعض القصور المهمة اللى اتهدمت ف اواخر العصر الحديث زى قصر القريعى ونصير وعلى بك الهاكع وعلى بك عثمان.
ج) بعض مبانى المنصورة الاثرية واحيائها :
1) مسرح المنصورة القومى : تم الاستعانة بأحد المعماريين المشهورين انذاك وهو ألدوماريللى عام 1902 واللى كان مقر للمجلس البلدى واتمثل فيه بعض المسرحيات زى الواعد انذاك محمد صبحى ومؤخرا اتعرض لحادث تفجير استهدف مبنى مديرية امن الدقهلية.
2) هتلاقى ف الكتاب بعض احياة المنصورة زى حى الحسنية : واللى عاش فيه فترة انيس منصور والحى منسوب الى حسنى بك العمرى وهتلاقى فيه بعض المعالم التاريخية والدينية زى مجمع الاديان وجامع حسين حسنى العمرى( وجماعة الاخوة الراهبين ولويس التاسع وانشاء مدارس الفرير عام 1889 ) واللى مكانها اصبحت مدرسة عمر بن الخطاب هتلاقى فيه كنيسة مار الياس وكنيسة القديس نيقولاس ومعبد مخلوف كوهين هتلاقى ف الحسنية :
ميت حدر و شارع النقراشى : اللى حكاياته كتيره وفيه مقام قديم للست ام الشعور ويقال انها سيدة ظل شعرها ينمو بعد وفاتها ويخرج من الارض وفيه مقام العراقى ومسجد الاربعين ومن اشهر من عاش ف ميت حدر الكاتب اليمنى المصرى على احمد باكثير اللى كتب رواية وااسلاماه بالمنصورة وعاش بالحى حوالى 10 سنوات عمل مدرسا فيها و عبد الله النديم خطيب الثورة العرابية وبعد مطاردة الخديوي توفيق له رجع مرة تانية وفتح بالحى صالون ادبى اللى كان محل لبيع المناديل متنكرا .
3) حى توريل : اللى انشاه ايلى توريل ع الطراز الاوربى 4) ميدان الشيخ حسانين(حى الحرافيش كما كانت يطلق عليه)
د) كانت المنصورة تسمى فينيسا الشرق لكثرة ترعها ومصارفها وسريان المراكب الشراعيه فيها طول الوقت
ه) اتصور ف المنصورة وتحديدا ف شارع البحر او الكورنيش بعض الافلام زى ( دلونى ياناس – القصر الملعون – غرام فى الطريق – الحب المحرم – افواه وارانب ) وغيرها
واغنية طير بينا يا قلبي لمحمد فوزى وكذلك عدد من المسلسلات
و) من اشهر المحافظين اللى تركوا اثر ف مدينة المنصورة مصطفى ماهر ، اسماعيل فريد وف العصر الحديث عبد الفتاح على ،فخر الدين خالد ، سعد الشربينى .
ز) سكن المنصورة ( مدينة المنصورة وليس الدقهلية او احدى قراها ) العديد من الشخصيات المشهورة زى ماقلت ابراهيم ناجى ، على محمود طه ، صالح جودت ، محمد الهمشرى وحسن الامام وعلى احمد باكثير وعبد الله النديم وعائلة الشناوى ومن الفنانين والشعراء والادباء والرياضين ورجال السياسة
واعلام المنصورة غير اعلام ومشاهير الدقهلية اللى تقريبا اغلب نجوم ومشاهير مصر من ادباء وفنانين ورجال دين وساسة وعسكرين واطباء من الدقهلية وقراها .
? اخيرا انا اختصرت جداااااااااا الى اقصى مدى ع ملل القارىء الكتاب مليان حكايات واحداث اول مرة تقرأ عنها وربما تعجب من بعض احداثها فإن كنت من المنصورة ربما يزداد فخرك بها وان لم تكن منها فأعرف قليلا من تراث احدى بلدانك العتيقة العريقه