تعرفوا على مشاهير تحدوا الفشل ..فما هي قصص نجاحهم ..محمود سامي

4 قصص نجاح لمشاهير تحدوا الفشل

• محمود سامي
• 04 مارس 2018

هُناك العديد من المشاهير الذين لم يكن نجاحهم مُجرد صُدفة بل حصلوا على النجاح بالعمل الجاد والمثابرة وتحدي الفشل وتحدي الظروف المُحيطة بهم، وهناك العديد من الأمثلة على ذلك يُمكنك معرفتها بقرائتك للسير الذاتية لهؤلاء الأشخاص، وفي هذه المقالة نُقدم لكم 4 قصص نجاح لمشاهير تحدوا الفشل وحققوا نجاح ساحق.

ملحوظة: القصص باللغة العامية
قصة بِن كارسون أو بنيامين كارسون


بِن كارسون أو بنيامين كارسون، والدته اتجوزت وهي عندها 13 سنة واطلقت بعد ما ولدته هو واخوه واضطرت تشتغل 3 وظائف في اليوم عشان تقدر تصرف على اولادها. بِن كان شقي في المدرسة ودرجاته كانت ضعيفة وزمايله كانوا بيلقبوه بالطالب "الغبي" ودا خلاه بيمتلك سلوك عدواني! والدته لما شافت تدني مستواه الدراسي هو واخوه أجبرت كل واحد فيهم انه يقرأ كتابين كل اسبوع ويعملوا تقرير عن كل كتاب ويسلموه ليها، وبالرغم من انها كانت بتعاني من ضعف القراءة الا انها كانت بتمثل انها بتقرأ وتشد خطوط تحت التقارير قدام ابنائها.

بِن كان بيقرأ عن الصخور وفي مرة في المدرسة، المدرس دخل الحصة بصخرة وطلب ان حد يقوله تفاصيل عنها، لما بِن رفع ايده عشان يجاوب الفصل كله ضحك واتريق عليه باعتباره طالب فاشل وغبي، بس بمجرد ما قال كل المعلومات اللى قرأها عن الصخرة دي كله انبهر بيه وشوية شوية بدأ يثق في نفسه أكتر وبقى زمايله يطلبوا منه يشرحلهم الحاجات اللى مش فاهمينها واتحول من طالب فاشل لطالب مجتهد بفضل القراءة ودرس الطب.

#بِن_كارسون هو واحد من أشهر جراحي الأعصاب حول العالم، له أكتر من تسعين كتاب متخصص، غير أنه أول شخص ينجح في عملية فصل التوأم السيامي المتصل بالرأس، وحاليًا مرشح نفسه في انتخابات الرئاسة الأمريكية، واتعمل عن قصة حياته فيلم بعنوان gifted hands.
لِيز موراي


ابوها وأمها كانوا مدمنين وماتوا بسبب الايدز ونتيجة لذلك كانت مشردة وعاشت حياة التسول في الشارع! ليز قررت متسكتش عن حياتها بالشكل دا، والتحقت بمدرسة. مكنش عندها مكان تسكن فيه فكانت بتنام في محطات المترو وتذاكر في الشارع لحد ما قدرت تحصل باجتهادها على منحة للدراسة في هارفارد وأصبحت محاضرة هناك وألفت كتب وبتدي محاضرات كأستاذ زائر.

#ليز_موراي كانت مشردة ومع ذلك قدرت توصل لهارفارد واتعمل عن حياتها فيلم اسمه Homeless to harvard.
سلمان خان


حصل على بكالريوس الرياضيات من MIT، وبكالريوس في الهندسة وعلوم الحاسب من MIT، وماجستير هندسة وعلوم الحاسب من MIT، وماجستير ادارة الأعمال من هافارد، وبيشتغل محلل مادي في بنك يعني معاه شهادات ووظيفة كلنا نحلم بيهم.

في مرة بنت أخته الصغيرة طلبت منه يشرحلها رياضيات لأنها مكنتش قادرة تفهمها، فشرحها ليها عن طريق الانترنت من خلال ياهو، ولما قرايبه طلبو منه يشرحلهم بردو اتبع معاهم نفس الطريقة. في 2006 سلمان خان قرر يعمل قناة على اليوتيوب سماها أكاديمية خان عشان يرفع عليها فيديوهات شرح للطلاب، وفي 2009 قرر يسيب وظيفته ومستقبله كله عشان يتفرغ لصناعة الفيديوهات دي!

سلمان خان دلوقتي بيمتلك أكاديمية خان اللى هي مؤسسة غير ربحية عندها أكثر من 10 مليون طالب، ولما اطلع اتكلم عن تجربته في احد محاضرات تيد، كان قاعد بروفيسور من جامعة ستانفورد وعجبته الفكرة ومن هنا انطلقت الكورسات الأونلاين.

#سلمان_خان باستخدام جهاز كمبيوتر واحد قدر يمتلك عشر ملايين طالب ويغير حرفيًا من انظمة التعليم حول العالم من خلال أكاديمية خان
إلون ماسك


اتولد في جنوب افريقيا بس قرر يهاجر، والتحق بجامعة بنسلفانيا وحصل على بكالريوس في الفيزياء والاقتصاد. بعد كدا انضم لبرنامج الدكتوراة في الفيزياء التطبيقية في جامعة ستانفورد اللى هي واحدة من أشهر جامعات العالم، بس قرر يترك برنامج الدكتوراة بعد يومين والسبب في دا "ان دي مش أسرع طريقة لتغيير العالم"

#إلون_ماسك هو الشخصية الحقيقية لـIron Man والرجل اللى غيّر العالم حرفيًا، أسس بنك paypal، و space x، وtesla motors غير مشاريعه اللى بتتحدى الواقع! إلون ماسك عنده شركة للسياحة الفضائية! وقدر من خلال مشاريعه انه يقلل تكلفة الوصول الى محطة الفضاء الدولية من 1 مليار دولار، الى 60 مليون دولار! يعني تقريبًا قلل التكلفة بنسبة 90 %..
الملخص


لو في سر معين للنجاح فهو انك تعافر، متسلمش بالواقع لمجرد انك اتحطيت فيه خصوصًا لو في مجال التعليم! بن كارسون كان فاشل بس بالقراءة اتحول لأنجح وأشهر جراح حول العالم.. ليز موراي كانت مشردة بس بالاجتهاد اتنقلت من الشارع لجامعة هارفارد اللى هي أفضل جامعة في العالم..

سلمان خان كان معاه كل الشهادات اللى ممكن نحلم بيها غير الوظيفة اللى مأمنة مستقبله بس قرر يضحي بكل دا عشان هدف وفكرة مؤمن بيها وفي الآخر بقى عندنا أشهر مدرس وأكثر راجل قام بالتأثير في التعليم حول العالم.. الون ماسك كان ممكن يكمل برنامج الدكتوراة ويتبع الطريق الروتيني بس شغفه انه يغير العالم واصراراه على دا خلاه يستحق انه يكون الرجل اللى غيّر العالم وما زال بيغير فيه عن طريق مشاريعه المجنونة والمبتكرة..

التاريخ فيه أماكن فاضية كتير في انتظار ان يتم حجزها، بس الأكيد ان اللى هيحجز مكانه في التاريخ هيكون على قدر كافي من الشجاعة أو الجنون لأنه يتمرد على الواقع ويعافر لحد ما يوصل لحلمه..