تويت
قصيدة : أمس.....!
رباعيات شعبية
شعر : مسلم الطعان
الاهداء: اليها وحدها وهي تدوس على أجراس
نبضي في طرقات الأمس واليوم......!
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!
-١-
أمس وإنته تكًلي حيل مشتاكً
شجاك اليوم باللحظه أنكرتني
راحت لهفتي وجمرات الأشواكً
انطفت ساعة برودك من شفتني....!
-٢-
أمس چان الغَزَل بيناتنا اخيوط
يغزلها الوفا بيني او بينك...
أشو صّبَح غزلَنا ماي مخبوط
او عين اللي هوتني موش عينك....!
-٣-
أمس بأشواكًنا نطوي المسافات
رجعنا اليوم فرشينا الطويناه..
شفايفنا بأمل نسكًيها بوسات
باست بس جمرنا وضاكًت أحَاه.....!
-٤-
أمس ياما أمس سولفنا اهواي
او حسبيت السوالف بيها أفرح
سراب اللي حچيته اوياي مو ماي
او راسي صار للشيبات مسرح.....!
-٥-
أمس چني إبحلم واحساسي جنحين
بيهن آنه طاير من فرحتي....
ومن فزيت روحي سألت العين....
بچت روحي من إجاها الرد: دمعتي....!
-٦-
أمس حسبالي أمس ما يخلص إبساع
او كًلت ويّاك تسعدني الثواني...
إجت ريح او خذلني صبر الشراع
او وكًف موجك إبضدّي ويْ زماني.......!
-٧-
أمس يا حيف أمس ما چَنَه ملموس
جدم تركت أثرها ابنبض الرمالْ....
دوَرت اعلى حظي الدومه منحوس
لكًيت الجدم ماهي والأثر شالْ......!
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!
الجمعة المصادف 7-12-2012
الساعة السابعة مساءا
سدني
استراليا