يا شام للشّاعرة الجميلة فخريّة رسلان

ياشام....
يا عباية قصب ...
بالعشق غزلت خيطها الأيام
يا كل حبات الوفا
بعنقود أسرار الدفا
يا درة الأحلام
شمسك ل ما بتعرف غفا
هونيك ع بوابك
نصبت خياما ودرّبت
خيالها
يحرس غفا عيونك قبل ماتنام
ياشام..
كلن إجوا تيسابقوا حلم انسرق
يفضوا ختم طهرك غصب
ياجهلهم ....
ياخجلة رجولة ورق...
ع صخر طهرك نكّسوا عكالاتهم
غلمان نخوا
يفتشو جياب الزمن
ع الكان....وياما كان
وماتعلموا ....
وك إييييييييييه ياست الحسن ..
.يامهرة الريح الاصيلة ...
السلّمت خيالها للجام
مابيعرفوا
إنك لصيرورة دهر
توأم سيام
وبيجهلواإنو الطهر
مجبول بترابك جبل
ع قاسيونك من زمان
اطلقوا رباب العشق
رفوف الحمام
ت يخاصروك
وبدلعهم ينشروا
ع الكون
معنى الكون
عطرك
و السلام
*******