تويت
-احكيلنا عن سفرية حضرتك وابنك محمد للبنان ؟
=انا كنت اتطلقت في سنة 67 المنحوسة دي ومعايا محمد عنده سنة وممعيش فلوس خالص غير 250 جنيه عمي المهم لقيت فريد الاطرش ورشدي أباظة وحسن الامام كلهم راحوا لبنان قام قالي عقلي روحي لبنان يمكن ربنا يفتحها عليكي ، قطعت التذاكر فضل معايا 13 جنيه مصري وصلت لبنان الناس اتلموا عليا ويسألوني "مريم فخر الدين مفيش حد مستنيكي؟!" ، قلتلهم لأ انا مش جاية اشتغل انا جاية أصيف انا وابني والمربية بتاعته .. جالي واد حليوة كده يتحنجلي قالي "تحبي أوصلك؟"، قلتله طيب عشان أوفر ال13 جنيه أجيب سيريلاك وعلبة نيدو عشان أوكل ابني ده أهم حاجة عندي ، انا كنت سامعة انهم بيروحوا عمارة على الروشة اسمها عمارة يعقوبيان فقلتله وديني عمارة يعقوبيان وصلنا قلتله شكرا قام ادالي الكارت بتاعه وقعد يقولي هعزمك في زحلة ونبقى نروح ونيجي وبتاع ، بعد ما نزلت من العربية اول زبا.لة قابلتني رميت الكارت بتاعه فيها علطول ??
المهم دخلت العمارة لقيت واد اسمه رياض قمور جدا اهلا مدام مريم ، قلتله بص انا عايزة شقة مفروشة بس التحويل لسه مجاش لان جمال عبدالناصر معصلج معانا في التحويل بس التحويل هييجي ان شاء الله قريب .. قالي تكرم عينك وراح مدخلني شقة تحفة تكييف وع البحر وأوضتين نوم فل .. بعدين نزلت سوبر ماركت تحت العمارة قابلني الراجل "أهلا ست مريم تاخدي ايه؟" ، قلتله "عايزة علبة سيريلاك وعلبة نيدو" .. قالي "هتاخدي ع النوتة ولا تدفعي فوري؟" ، قلتله "يعني ايه ع النوتة؟!" .. قالي "يعني تاخدي كل اللي انتي عايزاه ومتدفعيش حاجة وتمضي ع النوتة" ، قلتله اه هي النوتة دي أحسن حاجة ورحت واخدة نص المحل ع النوتة مش هدفع بقى .. المهم أكلنا الولد ونيمناه وطبخنا كشك وفراخ وبعدين رحت مكلمة رياض قلتله "مين عندك مصريين في العمارة؟" ، قالي "عندنا حسن الامام ورشدي أباظة وألبير نجيب وده جاي مع مراته وأمه و 3 عيال" ، قلت هو ألبير ده لانه جاي مع مراته وأمه وعياله يعني عايز يشتغل ومش هيبص لي ، شغلت الفهامة .. كلمته وعزمته هو والمدام ع الغدا وطبعا مقلتلوش ان انا عايزة شغل ولا جبت سيرة ، قام قالي "والله بنت حلال امبارح وانا قاعد ع الروشة في القهوة واحد منتج اسمه حبيب مجاعص قالي بدنا نجيب ست مريم نعملها فيلم".. كلمنا حبيب مجاعص جالنا انا طبعا معرفش الليرة سعرها ايه فقلتله بص انا معرفش الليرة هاتلي إسترليني كنت جاية من لندن بقى وعارفة الإسترليني ، 3الاف سترليني في الفيلم اخدت منهم 500 إسترليني وبعدين قلتله بص بقى انت لما تجيبني على لبنان لازم تدفعلي التذكرة انا اللي دفعت التذكرة عشان جاية أصيف ، قالي حقك ودفع .. قلتله كمان لما انت تجيبنا من مصر لازم انت اللي تأجر الشقة انزل لرياض وقوله التحويل جه واديله إيجار شهرين ، قالي حقك ودفع .. قلتله كمان البقال تدفعه هو انا هاكل على حساب نفسي وانت موجود ؟! ، قالي حقك ودفع
بعدين قالي انا عايز منك خدمة الساعة 10 بليل تلبسي وتتذوقي البدرون بتاع العمارة دي فيها سوبر نايت كلوب هعملك حفلة كبيرة وهجيب الصحفيين عشان يصوروكي عشان الفيلم .. قلتله حقك .. نزلت النايت كلوب لقيت يفط ترحيب بيا زي الانتخابات وورد وزغاريط وانا داخلة .. قعدنا كلنا على ترابيزة كبيرة وبعدين دخل واحد فقالي "ده فهد بلان اللي هتمثلي معاه" انا مجمعتش الاسم ميهمنيش أي حما.ر أمثل معاه انا في زنقة .. بعدين قالي قومي أرقصي معاه عايزين نصوركم وانتو بترقصوا قال يعني دي مشاهد للفيلم دعاية .. بعد ما رقصنا واتصورنا قام فهد قالي "مريم بدي أتزوجك" خبط لزق كده .. شوفي بقى من ولا حاجة لبيت لأكل لشغل لحفلة لجوز ليحيا الوطن كل ده في نفس اليوم .. عشان تعرفي ان ربنا لما يعوز يرفعك يرفعك ، ولما يعوز يخفسك يخفسك كل ده وال13 جنيه مصرفتهاش ولسه شايلاها في الدولاب عندي لحد النهاردة ، دي مبروكة ❤️