تويت
Walid Ali
ياربي دخيلك قصتنا قصه وعلقتنا علقة...قعيد ياابني تحكيلك...
بياتنا وجدودنا ولدورنا نحنا..يابني...كانت كل هالاراضي الحوالا الضيعة وبالويدي مافي حاكورة غير مزروعة ونربي جيج ودواب وعمرو ماينقصنا شي.
نجي لهلارض نبدرها ونفلحها وهالبندورة نشتلها ونسقيها وقت المنزرعها وماتشرب غير من المطر
ماعرفنا كيف هيك بلفونا...شو هالنوع البقر وشو هالنوع الجيج وشو هالحنطة..منجبلكن بقر بتحلب الوحدة قد عشرة ودنم الزرع بيعمل قد عشرة والجيجة بتبيض تلات بيضات باليوم...ويلي عليكن مافقركن....وجربو ا اول شي...
والله ياعمي لقلة عقلنا ومعرفتنا لا والله وطمعنا صدقنا...
والله وبلشنا نجيب...ياعمي اي هاه...
سنة ..تنتان..تلاته...لعمه وين اختفت البقرة الجولانية والعنزة الشامية والجيج البلدي...
اول سنه اي هاه الرزق تضاعف..ايو الله يامرا الحمدلله...بس قال مابينشال بدار منو..شو هالحكي..؟!؟.جينا تنشتري بدار صار السعر مضاعف...لاوالله وطلع في قال مرض بدو رش..اي ومنان الدوا قال منبيعكن اسمو ابعرف شو والشركة الاجنبية متلي شو اسما..اي...بدك موتور للرش...والصيصان اللي باعونا ياهن بدهن علفهن الخاص...لاوالله ومعوا دوا الماشي بتفيق الصبح ابتلاقي ويحد عيش...وصار في جيج وبيض..
هاه ولا بيظهر مرض بدو دوا...والبقرة بدها حلابة وعلف ودكتور...ولك اي...وتعبت البرية جقلين...متقول عندهن خبرة بهالشخلة ومخطط...اكيد هنن حطوا هالجقلين بهالبرية يمكن نزلوهن بطيارات بهاللال...
صار بدنا بويريد وخرتوش تنقوس الجقلين الماشي ميحفروا تحت القن ويفوتوا علاه...
والله صاروا يبيعونا بويريد وخرتوش...
وكل موسم يزيد سعر المواد...لاوالله واذا انزعجوا منا بيقطعوا العلف والبدار والخرتوش وبيمنعوا اي ويحد يبيعنا واذا كمشوا شي حدا مهربلنا بيصادروه وبيحبسوه...وياريت بس هيك...اذا قالولك وطي..رفاع جرياتك ياويلك ان ماسمعت...
واذا شافوك طلعت رجال وقضيت عالجقلين ومافيهن لحقوا يحطوا غيرهن...بيقوموا الدني علاك وبطلبوك لمحكمة العدل والرفق بالحيوان الدولية...وبتصير مجرم وبيبعتوا قوات من عندهن تتلم البويريد...وبتخرب كل شي ومابقى بتطلع...
ولابيبقى شي بلدي فيك تزرعوا...
ولك عطوني رغيف بس تكلوا انا وولادي...
وهيك صار فينا...في (وحش اممي )اذا مابتكمشوا من زلاعيموا وبتعص عرقبتوا ومابتفلتوا.يا روحك ياروحو..بدو يبيعك المي والهوا....
(وليد علي.../نانجنغ/الصين)