تويت
نهرانْ في جسد القصيدة...!
شعر شعبي تجريبي
شعر: مسلم الطعان
١-نَهر العِطَشْ...!
حلم يرسم روح روحه
ابريشة الضحكه
و يسافر للبعييييد
إبجنح نَسمَهْ
وَيْ عصافير الصبح...!
الصبح صَبّح مو صبح
ميِّتْ الواهسْ بروحه
وما يسولفْ للشمسْ
امغندبه اعيونه
ونزيفْ اغيومْ بيهن
مطرن وبللّن هدمه
الصبح ْ تشهگ مستحاته
كونْ يبقى إبلا هِدِمْ...!
الهِدِمْ هَدّت على إخيوطه
إذيابْ ريح
وبعثرتهنْ خيط خيط
و يا مسافه التغزلْ إخيوط الشملْ
والمغازلْ غَنّت بغابة حزنها:
الشَمِلْ شالْ وما يِرد ْ
إمنينْ أجيبْ إخيوط هِدمي
وشيلة أمّيْ ناشفة النهرانْ بيها
وباقي بسْ نهر العِطَشْ...!
العطشْ تايهْ ما ينگّط گلبه مايْ
العطشْ عطشانه روحه
ما يسولف ْ
السوالفْ باكًها النسيانْ مِنّه
وطشرّاها
او وزّعاها عالمسافات البِعيده
ما كو أصابع
تلمْ شَملكْ يا عطشْ
وتحفر ْ إبشّفّتَك بير ْ منْ القصايد ْ...!
القصايد ْ
ذابلْ الإيقاع ْ بيها
وشجرة النبضات ْ شاتلْها الجَمُر ْ
إمنينْ أجيبنْ مايْ أبخْ نبضْ القصيدة...!
الجمعة الموافق/12/6/2020
الساعة السادسة مساءً
صومعة السومري الغريب في الكوفة
٢-نَهَر أخرَسْ....!
رايْ ضايع
والغريبْ بدون رايْ:
خطوه خرسه
إبدربْ
ناشفْ نَهَر ْ صوته منْ زمانْ...!
من زمانْ الحلمْ يضحكْ
والدموع ْ:
إكتابْ كتبنّه أصابع غيمْ دايخ ْ
راح يمطر ْ
والحروفْ إتبلّلْ إهدومْ المسافه...!
المسافه:
نايْ شالنّه الغصونْ
حفرنْ إجروحه قصايد ْ
او غنّت لصوته العصافير ْ الحزينه
والأكواخ ْ
وزّعنْ آهااااااته
ويْ ريشْ السوالفْ....!
السوالفْ:
إفراشْ غبشه
النومْ ما نامْ إبحضنها
والجفونْ إمسافره إتدوَّر كحلْ
والمراود ْ عَزّلتْ دكّانها
إجنود ْ الترابْ
وراودتْها أفكار ْ ترحلْ للبعيد ْ...!
والبعيدْ:
إيقاع ْ ذابلْ
والورد ْ ذابتْ اسنينه
الريحه ماتتْ
ولا بخور إيعطّر ْ إهدوم الحقيقه
والضمير أرض بور
رفع رايات اليبابْ
الضمير إلسانْ أخرَسْ:
يِبَسْ بلسانه الكلامْ
الضمير نهر أخرَس
نِشَف ْ صوته منْ زِمااااااااااااااااااااانْ....!
الجمعة الموافق /12/6/2020
الساعة الواحدة والنصف ليلا
صومعة السومري الغريب في الكوفة