تويت
مصر ايام زمان
بمناسبه أن العيد قرب فموضوع بوستنا النهارده عن حكايه اغنيه يا ليله العيد
...... حكاية يا ليلة العيد ....
بالنسبالي بشوف ان اغنية يا ليلة العيد لام كلثوم هي الاغنية الرسمية للعيد..م
بمجرد ما اسمعها اوتوماتيكيلي بحس بالعيد.. ابويا كمان كانت بالنسباله هي الرؤية بتاعت الشهر.. ن
والحقيقة دي فرصة كويسة نحكي قصة الاغنية دي ..
كلمات احمد رامي والحان رياض السنباطي .. وغنتها ام كلثوم سنة 1939.. في فيلم دنانير .. وكانت بتمدح فيها هارون الرشيد ووزيره جعفر البرمكي
وقالت: ''يا دجلة ميتك عنبر ... وزرعك فى الغيطان نور .. يعيش هارون يعيش جعفر ... ونحيي لكم ليالي العيد'' ....
لكن التغيير الجذري للاغنية لما غنتها في النادي الأهلي سنة 1944.. وحضرها الملك فاروق .. فغنت وقالت:
يا نيلنا ميتك سكر ... وزرعك فى الغيطان نور
يعيش فاروق ويتهنى ... ونحييلُه ليالي العيد ...ص
يعني غيرت نهر دجلة بنهر النيل .. وفكت هارون وجعفر بعدد واحد ملك فاروق ملك مصر والسودان.. وبعدها راحت مكملة جزء من اغنيتها حبيبي يسعد أوقاته.
وقالت لفاروق
حبيبي زي القمر قبل ظهوره يحسبوا المواعيد
حبيبي زي القمر يبعث نوره من بعيد لبعيد
والليلة عيد ع الدنيا سعيد
عز وتمجيد لك يا مليكي
ساعتها الملك فاروق ادي لام كلثوم لقب صاحبة العصمة وكانت هي الست الوحيدة اللي من برا العيلة المالكة اللي تاخد اللقب دا.. ( لأن وفقا لتعريف اللقب فهو لقب يلقب به الاميرات اللاتى حصلن على وسام الكمال من الملك"..ر
وفضلت ام كلثوم من سنة 44 لسنة 52 تغني الاغنية بالكلمات الجديدة.. يعيش فاروق ويتهني ونحييله ليالي العيد.. لحد ما قامت الثورة .. فـ هوب دوبل كيك .. طلعت الملك فاروق برا التشكيلة .. وراحت مغيرة الاغنية .. وخلتها
يا نيلنا ميتك سكر ... وزرعك فى الغيطان نور
تعيش يا نيل ونتهنى ... ونحيي لك ليالي العيد.
لكن بعيدا عن اي شيئ.. وبعيدا عن تغير الكلمات .. تظل هذه الاغنية اعظم ما تم غنائه للعيد وتظل ام كلثوم واحدة من أفضل من غنوا بالعربية .. ويا ليلة العيد انستينا وجددتي الامل فينا....
وكل سنه وانتم طيبين مقدما ..
كل التفاعلات:
Fatima Alnukkari
Eliane Rossillon